Gadchiroli Municipal Council BJP Corporator Bribe
गडचिरोली : नगर पंचायतींतर्गत मिळालेल्या विद्युत कामाचे कमिशन म्हणून एका कंत्राटदाराकडून १ लाख २० हजार रुपयांची लाच स्वीकारताना अहेरी नगर पंचायतीचा भाजपचा स्वीकृत नगरसेवक अमोल गुडेल्लीवार (वय ४७) यास रंगेहाथ पकडले. ही कारवाई लाचलुचपत प्रतिबंधक विभागाच्या अधिकाऱ्यांनी गुरूवारी (दि.१५) केली.
एसीबीने दिलेल्या माहितीनुसार, तक्रारकर्त्या कंत्राटदाराला अहेरी नगर पंचायतीकडून विद्युतविषयक कामाचे कंत्राट मिळाले आहे. या कामाचे कमिशन म्हणून नगरसेवक अमोल गुडेल्लीवार याने संबंधित कंत्राटदाराला १ लाख २० हजार रुपयांची लाच मागितली. परंतु लाच देण्याची मुळीच इच्छा नसल्याने कंत्राटदाराने गोंदिया येथील लाचलुचपत प्रतिबंधक विभागाकडे तक्रार केली.
त्यानंतर या विभागाच्या अधिकाऱ्यांनी लाचेची पडताळणी करुन आज सापळा रचला. त्यानुसार दुपारी १ वाजताच्या सुमारास अहेरी येथील मुख्य बाजारपेठेत अमोल गुडेल्लीवार यास तक्रारकर्त्या कंत्राटदाराकडून १ लाख २० हजार रुपयांची लाच स्वीकारताना एसीबीच्या अधिकाऱ्यांनी रंगेहाथ पकडले. त्यानंतर अहेरी पोलिस ठाण्यात अमोल गुडेल्लीवार याच्यावर गुन्हा दाखल करण्यात आला.
गोंदिया येथील लाचलुचपत प्रतिबंधक विभागाचे उपअधीक्षक नीलेश लोधी, गडचिरोलीचे उपअधीक्षक विक्रांत सगणे यांच्या नेतृत्वातील पथकाने ही कारवाई केली.