गडचिरोली, पुढारी वृत्तसेवा : शेताजवळच्या जंगलात बैल चारत असताना वाघाने हल्ला करुन एका शेतकऱ्यास ठार केले. ही घटना गुरुवारी (दि.३) दुपारी दोन वाजताच्या सुमारास गडचिरोलीपासून ८ किलोमीटर अंतरावरील राजगाटा चेक गावानजीक घडली. सुधाकर भोयर (वय ५० रा.राजगाटा चेक) असे वाघाच्या हल्ल्यात मृत्यू झालेल्या शेतकऱ्याचे नाव आहे.
सुधाकर भोयर हे आज बैल घेऊन आपल्या शेतावर गेले होते. शेतालगतच्या जंगलात बैल चारत असताना अचानक भोयर यांच्यावर वाघाने हल्ला केला. यात ते जागीच ठार झाले. घटनेची माहिती मिळताच पोलीस आणि वनाधिकाऱ्यांनी घटनास्थळ गाठून मृतदेहाचा पंचनामा केला. वारंवार वाघाच्या हल्ल्यांच्या घटना घडत असल्याने नागरिक भयभीत झाले आहेत. आज हल्ला करणारी टी-६ वाघीण असल्याचा अंदाज वनाधिकाऱ्यांनी व्यक्त केला. या वाघीणीने आतापर्यंत ६ जणांचे बळी घेतले आहेत.