अकोला : पुढारी वृत्तसेवा
अकोल्यातील उरळ पोलीस स्टेशनच्या हद्दीत येणाऱ्या निंबा–तेल्हारा मार्गावरील कारंजा फाट्याजवळ एका तरुण विद्यार्थ्याची अतिशय क्रूरपणे हत्या करण्यात आली. गौरव बायस्कार असे मृत युवकाचे नाव असून तो कारंजा येथील जिजामाता महाविद्यालयात बी.ए.चे शिक्षण घेत होता. रविवार उशीरा रात्री ही धक्कादायक घटना घडली.
गौरव हा मूळचा अंदुरा गावचा रहिवासी. शिक्षणासाठी तो कारंजा येथे राहत होता. काही मित्रांसोबत तो कारंजा फाट्याजवळ गेला असताना काही अपरिचित तरुणांशी त्याचा किरकोळ वाद झाला. पाहता पाहता हा वाद इतका वाढला की संबंधित युवकांनी अचानक त्याच्यावर हल्ला चढवला. लाकडी दांडक्यांसह इतर वस्तूंचा वापर करून गौरववर बेदम मारहाण करण्यात आली.
मारहाण इतकी गंभीर होती की गौरवचा घटनास्थळीच मृत्यू झाला. त्याच्या मित्रांनी आरडाओरडा केला, परंतु तोपर्यंत हल्लेखोर पळून गेले होते. घटनेची माहिती तात्काळ उरळ पोलीस स्टेशनला देण्यात आली. माहिती मिळताच पोलीस पथकाने घटनास्थळी धाव घेतली. पंचनामा करून शवविच्छेदनासाठी पाठवण्यात आले.
घटनेनंतर संपूर्ण परिसरात एकच खळबळ उडाली आहे. एका तरुण विद्यार्थ्याचा एवढ्या किरकोळ कारणावरून जीव घेतल्याने नागरिकांमध्ये संतापाचे वातावरण आहे. विद्यार्थी वर्गातही हळहळ व्यक्त केली जात आहे.
पोलिसांनी प्राथमिक चौकशीत वाद कशामुळे निर्माण झाला, गौरव आणि आरोपी युवकांमध्ये आधीपासून काही तणाव होता का, याबाबत सविस्तर तपास सुरू केला आहे. घटनास्थळावरील काही साक्षीदारांचीही चौकशी करण्यात येत आहे.
पोलिसांना मिळालेल्या माहितीनुसार लोहारा येथील दोन युवकांनी या हल्ल्यात सहभाग घेतल्याची शक्यता आहे. हल्ल्यानंतर ते दोघेही पसार झाले असल्याचे समोर आले आहे. त्यांच्या शोधासाठी स्वतंत्र पथक तयार करण्यात आले असून परिसरातील सीसीटीव्ही फुटेजदेखील तपासले जात आहेत.
अकोल्याचे जिल्हा पोलीस अधीक्षक अर्चित चांडक यांनी या प्रकरणाची गंभीर दखल घेतली असून तातडीने आरोपींचा शोध घेऊन कठोर कारवाई करण्याचे आदेश स्थानिक पोलिसांना दिले आहेत. आरोपींना लवकरात लवकर अटक करण्यासाठी शोधमोहीम वाढवण्यात आली आहे.
गौरवच्या हत्येमुळे त्याच्या कुटुंबावर दुखाचे सावट पसरले आहे. शिक्षणासाठी घरापासून दूर राहणारा मुलगा अशा प्रकारे जीव गमावेल, याची कोणी कल्पनाही केली नव्हती. मित्र, नातेवाईक आणि गावकऱ्यांनी यावर तीव्र संताप व्यक्त केला आहे.
या प्रकरणातील आरोपी कोण, वादाचे मूळ कारण काय, आणि हत्या पूर्वनियोजित होती का, याबाबतचे सर्व तपशील तपासात पुढे उघड होणार आहेत.