मिरा रोड: मुंबईतील ऑर्केस्ट्रा बारमध्ये काम करणाऱ्या तरुणींना देहव्यापाराच्या दलदलीत ढकलणाऱ्या एका महिला एजंटला नयानगर पोलिसांनी सापळा रचून अटक केली आहे. या कारवाईत पोलिसांनी तीन पीडित तरुणींची सुटका केली असून, या रॅकेटचे धागेदोरे मुंबई, ठाणे आणि वसई-विरारपर्यंत पसरले असल्याचे समोर आले आहे.
मीरा-भाईंदर, वसई-विरार पोलीस आयुक्तालयाचे पोलीस उपायुक्त राहुल चव्हाण यांना मिळालेल्या माहितीनूसार मीरा रोड येथील नयानगर पोलीस ठाण्याच्या हद्दीत, एक महिला दलाल ऑर्केस्ट्रा बारमधील तरुणींचे फोटो ग्राहकांना पाठवून त्यांना देहव्यापारासाठी पुरवणार आहे.
या माहितीची शहानिशा करण्यासाठी वरिष्ठ पोलीस निरीक्षक अमर जगदाळे यांच्या मार्गदर्शनाखाली नयानगर पोलिसांनी एक पथक तयार केले. पोलिसांनी पयाडे हॉटेल परिसरात बनावट ग्राहक आणि पंच पाठवून सापळा रचला. महिला दलाल तरुणींना घेऊन येताच पोलिसांनी झडप घालून तिला ताब्यात घेतले.
तपासात निष्पन्न झाले की, अटक करण्यात आलेली महिला गेल्या दोन वर्षांपासून मुंबई, मीरा-भाईंदर आणि वसई-विरार परिसरात हे रॅकेट चालवत होती. ती मुंबईतील विविध ऑर्केस्ट्रा बार आणि डान्स क्लबमधील तरुणींचे फोटो ग्राहकांना पाठवून सौदेबाजी करत असे.
त्यानंतर लॉजिंग किंवा इतर ठिकाणी या तरुणींना पाठवले जात असे. या कारवाईत पोलिसांनी 3 पीडित तरुणींची सुटका केली असून त्यांची महिला सुधारगृहात रवानगी केली आहे. अटक केलेल्या महिला आरोपीवर गुन्हा दाखल करण्यात आला आहे.