मुंब्रा: मुंब्रा, कौसा, दिवा आणि शीळफाटा परिसरात दरवर्षी मुसळधार पावसामुळे उद्भवणारी पाणी साचण्याची समस्या आणि फ्लॅश फ्लडचा धोका लक्षात घेऊन ठाणे महानगरपालिकेने (टीएमसी) महत्त्वाचा निर्णय घेतला आहे.
रस्ते सफाई आणि नालेसफाईचे काम अखंडपणे सुरू राहावे, यासाठी विद्यमान कंत्राटदारांना मुदतवाढ देण्यास मंजुरी देत २४.७९ कोटी रुपयांचा आपत्कालीन निधी मंजूर करण्यात आला आहे. या निर्णयामुळे पावसाळ्याच्या उर्वरित काळात शहरातील पावसाच्या पाण्याचा निचरा सुरळीत ठेवण्यास मोठी मदत होणार आहे.
यावर्षी मान्सूनच्या सुरुवातीपासूनच ठाणे शहरासह मुंब्रा, कौसा आणि दिवा परिसरात अनेक वेळा मुसळधार पाऊस झाला. त्यामुळे काही भागांमध्ये रस्त्यांवर पाणी साचणे, वाहतुकीचा वेग मंदावणे आणि नागरिकांना मोठ्या गैरसोयींचा सामना करावा लागला.
विशेषतः मुंब्रा-शीळफाटा बायपास, अमृतनगर, कौसा, रेटीबंदर, शिळफाटा मार्ग तसेच दिव्यातील सखल भागांमध्ये पाणी साचण्याच्या घटना वारंवार घडत असल्याने प्रशासनावर तातडीने उपाययोजना करण्याचा दबाव वाढला होता.
दरम्यान शहरातील नवीन स्वच्छता आणि नालेसफाईच्या निविदा प्रक्रियेला अपेक्षेपेक्षा अधिक वेळ लागत असल्याने जुन्या कंत्राटदारांचा कार्यकाळ संपण्याची वेळ आली होती. अशा परिस्थितीत नालेसफाईची कामे थांबली असती तर मुसळधार पावसाच्या पार्श्वभूमीवर शहरासमोर गंभीर पूरस्थिती निर्माण होण्याची शक्यता होती.
ही बाब लक्षात घेऊन महापालिका प्रशासनाने आणीबाणीच्या स्वरूपात विद्यमान कंत्राटदारांना मुदतवाढ देण्याचा निर्णय घेतला.
या निर्णयानंतर मुंब्रा, कौसा आणि दिवा परिसरातील प्रमुख नाले, गटारे, पर्जन्यजल वाहिन्या आणि पाण्याचा निचरा करणाऱ्या मार्गांची साफसफाई युद्धपातळीवर सुरू करण्यात आली आहे. नाल्यांमध्ये साचलेला गाळ, प्लास्टिक कचरा, झाडांच्या फांद्या आणि इतर अडथळे हटवून पाण्याचा प्रवाह सुरळीत करण्यावर भर दिला जात आहे.
पालिकेच्या अधिकाऱ्यांनी दिलेल्या माहितीनुसार, पावसाचा जोर वाढल्यास फ्लॅश फ्लडची परिस्थिती निर्माण होऊ नये, यासाठी संवेदनशील ठिकाणांवर विशेष पथके तैनात करण्यात आली आहेत.
पाणी साचण्याची शक्यता असलेल्या भागांवर सातत्याने लक्ष ठेवले जाणार असून आवश्यकतेनुसार तातडीने यंत्रसामग्री आणि मनुष्यबळ उपलब्ध करून दिले जाणार आहे. विशेष म्हणजे, मुंब्रा-शीळफाटा बायपास हा ठाणे, नवी मुंबई आणि कल्याणकडे जाणारा महत्त्वाचा वाहतूक मार्ग असल्याने या परिसरात पाणी साचल्यास वाहतुकीवर मोठा परिणाम होतो. त्यामुळे या मार्गालगतच्या नाल्यांची साफसफाई प्राधान्याने सुरू करण्यात आली आहे. याशिवाय कौसा, अमृतनगर, दिवा आणि इतर सखल भागांमध्येही विशेष मोहीम राबविण्यात येत आहे.
मुसळधार पावसाचा इशारा कायम
पालिकेच्या या निर्णयामुळे पावसाळ्याच्या काळात शहरातील पाणी साचण्याच्या समस्या कमी होण्यास मदत होईल, अशी अपेक्षा व्यक्त केली जात आहे. मात्र, नागरिकांनीही नाल्यांमध्ये कचरा टाकू नये, प्लास्टिकचा वापर टाळावा आणि पावसाळ्यात प्रशासनाला सहकार्य करावे,
असे आवाहन महापालिकेकडून करण्यात आले आहे. मुसळधार पावसाचा इशारा कायम असल्याने पुढील काही दिवस नालेसफाई आणि रस्ते स्वच्छतेची कामे अधिक वेगाने सुरू ठेवण्याचे नियोजन प्रशासनाने केले आहे.