ठाणे : ठाण्यातून जाणाऱ्या मुख्य मेट्रोला कनेक्टिव्हीटी म्हणून नियोजित करण्यात आलेले ठाण्याची अंतर्गत मेट्रो 2029 ला सुरु करण्याचे नियोजन ठेवण्यात आले आहे. यासाठी नोव्हेंबर म्हणजेच पुढच्या महिन्यात अंतर्गत मेट्रोच्या कामाला सुरवात होण्याची शक्यता आहे. ठरल्याप्रमाणे 2029 ला अंतर्गत मेट्रो सुरु झाल्यास ठाण्याचा प्रवास आणखी वेगवान होणार आहे.
वडाळा-घाटकोपर ते कासारवडवली अशा ठाण्यातून जाणाऱ्या मुख्य मेट्रो मार्गाला जोडण्यासाठी नियोजित असलेल्या ठाण्याच्या अंतर्गत मेट्रो मार्गाला राज्य शासनाकडून यापूर्वीच गती मिळाली आहे. तब्बल 12 हजार 500 कोटींचा प्रकल्प असलेल्या या मेट्रोला केंद्र सरकारकडून यापूर्वीच मान्यता मिळाली आहे. एमएमआरडीएच्या वतीने वडाळा-घाटकोपर ते कासारवडवली आणि पुढे गायमुख या मुख्य मेट्रो प्रकल्पाचे काम सुरू आहे.
या मुख्य मेट्रोला जोडण्यासाठी तत्कालीन ठाणे पालिका आयुक्त संजीव जयस्वाल यांच्या कार्यकाळात अंतर्गत मेट्रोची आखणी करण्यात आली होती. महामेट्रो कंपनीकडून या संपूर्ण प्रकल्पाचा डीपीआर तयार करण्यात आला होता. मात्र अंतर्गत मेट्रो हा अधिक खर्चिक असल्याचे सांगत केंद्राने अंतर्गत मेट्रो ऐवजी एलआरटी प्रकल्प राबवण्याच्या सूचना ठाणे महापालिकेला केल्या होत्या.
वर्तुळाकार मेट्रो हा प्रकल्प 13 हजार कोटींचा होता तर एलआरटी प्रकल्पाची किंमत ही 7 हजार 165 कोटींच्या घरात होती. त्यामुळे एलआरटीमुळे सुमारे 5 हजार कोटींची बचत होणार होती. तसा प्रस्तावही पालिकेने मंजुरीसाठी राज्य शासनाकडे पाठवला होता. मात्र भविष्यातील प्रवासी संख्या लक्षात घेता एलआरटी प्रकल्प व्यवहार्य नसल्याचे मत मत केंद्राने नोंदवल्याने केंद्राच्या सूचनेनंतर पुन्हा अंतर्गत मेट्रोचा प्रस्ताव तयार करून तो केंद्राच्या मान्यतेसाठी पाठविण्यात आला होता .त्यानंतर केंद्रानेही अंतर्गत मेट्रोला मान्यता दिली आहे. तसेच यासाठी 12 हजार कोटींची तरतूद देखील केली आहे.
काही दिवसांपूर्वीच मुख्य मेट्रोची ट्रायल रन घेण्यात आली होती. हा मार्ग लवकर सुरु करण्याचा एमएमआरडीएचा मानस आहे. दुसरीकडे अंतर्गत मेट्रो अद्याप कागदावरच असून या प्रकल्पासाठी काहीच हालचाली करण्यात आल्या नव्हत्या. अखेर नोव्हेंबर पासून या कामाला गती मिळण्याची शक्यता असल्याची माहिती सूत्रांनी दिली आहे.
असा आहे अंतर्गत मेट्रो मार्ग
एकूण 29 किमी लांबीच्या या प्रकल्पात 26 किमी लांबीचा मार्ग हा उन्नत असून 3 किमीचा मार्ग हा भूमिगत आहे. प्रकल्पांर्गत एकूण 22 स्थानके असून त्यातील दोन स्थानके भूमिगत असणार आहेत. त्यातील एक भूमिगत स्थानक ठाणे रेल्वे स्थानकाला जोडले जाणार आहे. अन्य स्थानके शहरातील मेट्रो कॉरिडॉरला जोडली जाणार आहेत. अंदाजे 7. 61 लाख प्रवाशांना दररोज या मेट्रो रेल्वे सेवेचा लाभ होणार आहे. ठाण्यातील नौपाडा, वागळे इस्टेट, डोंगरीपाडा, हिरानंदानी इस्टेट, कोलशेत, साकेत आदी भाग या मेट्रो रेल्वे सेवेने जोडला जाणार आहे. 2029 पर्यंत मेट्रोची सुरुवात होणार असल्याची माहिती सूत्रांनी दिली आहे.
वर्तुळाकार मेट्रोची प्रस्तावित स्थानके
वागळे इस्टेट, लोकमान्य, शिवाईनगर, गांधीनगर, मानपाडा, डोंगरीपाडा, वाघबीळ, आझादनगर, मनोरमानगर, कोलशेत, बाळकूम, राबोडी, ठाणे स्टेशन