ठाणे : ठाण्यातील ‘उबाठा’ पक्षाचे विभाग प्रमुख प्रदीप पूर्णेकर हत्या प्रकरणात मारेकऱ्यांनी वापरलेले पिस्तुल पोलिसांनी कर्नाळा येथील जंगलातून जप्त केले आहे.
पूर्णेकर यांची हत्या करणारे अटकेतील आरोपी निखिल यादव व नितेश पवार या दोघांनी हे पिस्तुल कर्नाळा येथील जंगलात फेकून दिले होते अशी माहिती तपासातून समोर आल्यानंतर एसआयटी पथकाने दोघा आरोपींनी सोबत घेऊन मंगळवारी सायंकाळी कर्नाळा जंगल गाठले. यावेळी निखिल यादव याचा मोबाईल देखील जंगलातून जप्त करण्यात आला. त्यामुळे या गुन्ह्यातील तपासात हा मोठा पुरावा पोलिसांच्या हाती लागल्याचे मानले जात आहे.
ठाण्यातील उबठा पक्षाचे विभाग प्रमुख प्रदीप पूर्णेकर यांच्या हत्येला आठवडा पूर्ण होत आला तरी या गुन्ह्याचा उलगडा झालेला नाही. या गुन्ह्यातील पप्या शिंदे, निखिल यादव व नितेश पवार या तीन आरोपींना पोलिसांनी अटक केली असून संतोष कनोजिया उर्फ टल्ली आणि एक अज्ञात मारेकरी अद्याप देखील फरार आहेत.
एसआयटी टीमने शुक्रवारी पहाटेच्या सुमारास मुंबई-गोवा महामार्गावरील कर्नाळा येथील जंगला जवळील एका डेअरी फर्म मधून निखिल यादव व नितेश पवार दोघा मारेकऱ्यांना अटक केली होती. यावेळी कर्नाळा येथील जंगलातून एक पिस्तुल व आरोपीचा मोबाईल पोलिसांनी जप्त केला. तर खूप शोध घेऊन देखील धारदार हत्यार सापडले नाही.