डोंबिवली (ठाणे ) : कल्याण पश्चिमेकडील चिकणघर परिसरात राहणाऱ्या तरूणाने काळा तलावात उडी घेऊन जीवनयात्रा संपवली. ही घटना शनिवारी रात्रीच्या सुमारास घडली. आई/बाबा मला माफ करा... असा व्हॉट्सॲपवरील स्टेटस्वर मेसेज टाकून या तरूणाने स्वतःचे जीवन संपवून टाकले.
आपल्या भावाने त्याच्या व्हॉट्सॲपच्या स्टेटस्वरील मेसेज वाचल्याने भावाला संशय आला. त्याने आपल्या मोठ्या भावाचा कुटुंबीयांच्या साह्याने परिसरात शोध घेतला असता तो आढळला नाही. अखेर महात्मा फुले चौक पोलिस आणि मृताच्या कुटुंबीयांनी शोध घेतल्यानंतर तरूणाचा मृतदेह काळा तलावात आढळून आला. त्यामुळे या तरूणाने जीवनयात्रा संपवल्याचे उघड झाले. प्रदीप किसन भोईर (३०) असे मृत तरूणाचे नाव असून कल्याण पश्चिमेतील चिकणघर परिसरात असलेल्या हरीओम सोसायटी परिसरात आपल्या कुटुंबीयांसह राहत होता. नोकरी/व्यवसायानिमित्त कल्याणात राहणारे भोईर कुटुंब हे मुळचे मुरबाड तालुक्यातील शेलारी गावचे रहिवासी आहेत.
नोकरी/व्यवसायानिमित्त ते कल्याण येथे राहतात. या संदर्भात मृत प्रदीपचा भाऊ रमाकांत भोईर याने दिलेल्या माहितीनुसार महात्मा फुले चौक पोलिस ठाण्यात नोंद करण्यात आली आहे. या संदर्भात पोलिस सूत्रांकडून मिळालेल्या माहितीनुसार, शनिवारी रात्रीच्या सुमारास प्रदीप भोईर घराबाहेर पडला. नेहमीप्रमाणे घरी येईल, असे कुटुंबीयांना वाटले. याच दरम्यान प्रदीपने त्याच्या व्हॉट्स ॲपवर आई/बाबा मला माफ करा... असा मेसेज स्टेटसवर टाकला होता.
जीवनयात्रा संपवण्यामागचे कारण काय ?
प्रदीपने त्याच्या व्हॉट्सॲपच्या स्टेटस्वर टाकलेला मेसेज रमाकांतने वाचला. या मेसेजमुळे पोलिसांना प्रदीपपर्यंत पोहोचता आले. आई-बाबा मला माफ करा... असा मेसेज स्टेटस्वर टाकणाऱ्या प्रदीपने टोकाचे पाऊल का उचलले? त्याच्या जीवनयात्रा संपवण्यामागचे कारण काय असावे? आदी प्रश्नांचा उलगडा करण्याचा पोलिस प्रयत्न करत आहेत.