सोलापूर : ग्रामदैवत श्री सिद्धरामेश्वर यात्रेतील विधींना शनिवार, दि. 10 जानेवारीपासून प्रारंभ होणार आहे. दरवर्षीप्रमाणे योगदंड पूजन, नंदीध्वजास साज चढविणे, तैलाभिषेक, अक्षता सोहळा, होम प्रदीपन, दारूकाम, नंदीध्वजांचे वस्त्र विसर्जन हे धार्मिक विधी होणार असल्याची माहिती ग्रामदैवत श्री सिद्धरामेश्वर महायात्रेचे पहिल्या नंदीध्वजाचे मानकरी राजशेखर हिरेहब्बू यांनी पत्रकार परिषदेत दिली.
शनिवार, दि. 10 रोजी योगदंडाची पूजा शेटे वाड्यात होणार आहे. रविवार, दि. 11 रोजी रात्री 12.05 वाजता हिरेहब्बू वाड्यात मानाच्या पहिल्या आणि दुसऱ्या नंदीध्वजास साज चढविण्याचा कार्यक्रम होणार आहे. सोमवार, दि. 12 रोजी श्री सिद्धरामेश्वरांनी स्थापन केलेल्या 68 लिंगांना तैलाभिषेक करुन धार्मिक विधींना प्रारंभ होणार आहे. ही मिरवणूक सकाळी 8 वाजता हिरेहब्बू वाड्यापासून सुरुवात होणार आहे.
मंगळवारी दि. 13 रोजी सकाळी 7 वाजता हिरेहब्बू वाड्यापासून नंदीध्वज मिरवणुकीस प्रारंभ होणार आहे. ही मिरवणूक ग्रामदैवत श्री सिद्धरामेश्वर मंदिरात आल्यानंतर संमती कट्ट्यावर लाखो भाविकांच्या उपस्थितीत अक्षता सोहळा होणार आहे. बुधवारी दि. 14 रोजी मकर संक्रांतीच्या दिवशी होम मैदानावर होमप्रदीपनाचा समारंभ होणार आहे. गुरुवारी दि. 15 रोजी किंक्रांत असून त्यादिवशी होम मैदानावर शोभेचे दारूकाम होणार आहे. तर शुक्रवारी दि. 16 रोजी नंदीध्वजांच्या वस्त्रविसर्जनाचा कार्यक्रम होणार आहे.
नंदीध्वजांच्या मिरवणुकीला हिरेहब्बू मठातून सुरुवात होईल. श्री सिद्धेश्वर यात्रेसाठी महाराष्ट्रासह आंध्र प्रदेश, तेलंगणा, कर्नाटक येथून जवळपास तीन ते चार लाख भाविक येतात. या पत्रकार परिषदेस यात्रेचे मानकरी सुधीर देशमुख, मनोज हिरेहब्बू, जगदीश हिरेहब्बू, संजय हिरेहब्बू, संतोष हिरेहब्बू, धनेश हिरेहब्बू, विनोद हिरेहब्बू, विकास हिरेहब्बू, मल्लिनाथ मसरे, सुधीर थोबडे, सोमनाथ मेंगाणे, योगीराज म्हेत्रे-कुंभार, चिदानंद मुस्तारे तसेच विविध नंदीध्वजांचे मास्तर उपस्थित होते.