Solapur Gram Sabha Reservation Draw
पटवर्धन कुरोली : आगामी ग्रामपंचायत निवडणुकांच्या पार्श्वभूमीवर ग्रामपंचायत उजनी वसाहत, पटवर्धन कुरोली येथे सदस्यपदांच्या आरक्षण सोडतीसाठी विशेष ग्रामसभेचे आयोजन करण्यात आले. ग्रामस्थांच्या उत्स्फूर्त उपस्थितीत ही ग्रामसभा शांततापूर्ण व पारदर्शक वातावरणात पार पडली.
ग्रामसभेच्या अध्यक्षस्थानी सरपंच मनिषा अभिमान कोयले या होत्या. यावेळी ग्रामसेवक भाऊसाहेब खरात, सर्कल अधिकारी शामबाला कुंभार, ग्राम महसूल अधिकारी प्रकाश भिंगारे तसेच गावातील मान्यवर नागरिक आणि मोठ्या संख्येने ग्रामस्थ उपस्थित होते.
शासनाच्या निर्धारित नियमांनुसार आणि पारदर्शक प्रक्रियेद्वारे सदस्यपदांच्या आरक्षणाची सोडत काढण्यात आली. सोडत प्रक्रियेदरम्यान उपस्थित ग्रामस्थांना आरक्षणाबाबत सविस्तर माहिती देण्यात आली. तसेच आरक्षण निश्चितीची संपूर्ण प्रक्रिया सर्वांच्या उपस्थितीत पारदर्शकपणे पार पडली.
ग्रामसभेच्या शेवटी उपस्थित ग्रामस्थांनी प्रक्रियेबाबत समाधान व्यक्त केले. आगामी ग्रामपंचायत निवडणूक लोकशाही मूल्ये जपत शांततापूर्ण आणि निष्पक्ष वातावरणात पार पाडण्यासाठी सर्वांनी सहकार्य करावे, असे आवाहन यावेळी करण्यात आले.
या विशेष ग्रामसभेला ग्रामपंचायत पदाधिकारी, कर्मचारी आणि ग्रामस्थांची मोठ्या संख्येने उपस्थिती लाभली.