टेंभुर्णी : उजनी धरणाच्या बॅकवॉटर क्षेत्रात सुरू असलेल्या अवैध वाळू उपशावर टेंभुर्णी पोलिसांनी धाडसी छापा टाकून सुमारे ५ लाख ५७ हजार रुपयांचा मुद्देमाल जप्त केला आहे. ही कारवाई १५ एप्रिल रोजी अकोले-खुर्द (ता. माढा) शिवारात करण्यात आली.
टेंभुर्णी पोलीस ठाण्याचे प्रभारी तथा सहायक पोलीस अधीक्षक (IPS) राहुल आत्राम यांना अकोले-खुर्द येथील एमआयडीसीच्या जुन्या जॅकवेलजवळ यांत्रिक बोटीद्वारे अवैध वाळू उपसा सुरू असल्याची गोपनीय माहिती मिळाली होती. या माहितीच्या आधारे आत्राम यांनी आपल्या पथकासह धरणाच्या पात्रात छापा टाकला.
पोलिसांनी केलेल्या या कारवाईत खालील साहित्य जप्त करण्यात आले आहे.
यांत्रिक फायबर बोट (सेक्शन पंप): किंमत २ लाख रुपये.
वाळू उपशाचे पाईप: किंमत ३ लाख रुपये.
१० ते १२ ब्रास वाळू: किंमत ५७ हजार रुपये. असा एकूण ५ लाख ५७ हजार रुपयांचा साठा जप्त करून पोलिसांच्या ताब्यात देण्यात आला आहे. कारवाईदरम्यान आरोपी मात्र पळून जाण्यात यशस्वी झाले.
या घटनेनंतर महसूल विभागाचे तहसीलदार संजय भोसले यांच्या सूचनेवरून ग्रामसेवक शिवराज पाटील, मंडल अधिकारी सुजित शेळवणे व अन्य कर्मचाऱ्यांनी घटनास्थळी धाव घेऊन रीतसर पंचनामा केला. ग्राम महसूल अधिकारी शिवराज पाटील यांनी दिलेल्या फिर्यादीवरून अज्ञात बोट मालक आणि चालकांविरुद्ध टेंभुर्णी पोलीस ठाण्यात गुन्हा दाखल करण्यात आला आहे.
ही कारवाई सोलापूर ग्रामीणचे पोलीस अधीक्षक अतुल कुलकर्णी, अप्पर पोलीस अधीक्षक प्रीतम यावलकर, आणि सहा. पोलीस अधीक्षक अंजना कृष्णा व्ही.एस. यांच्या मार्गदर्शनाखाली पार पडली. या पथकात आयपीएस राहुल आत्राम यांच्यासह पोलीस कर्मचारी सचिन भोसले, अमर काजी, महावीर कोकाटे, आकाश खकाळ आणि संदीप साखरे यांचा समावेश होता.