सोलापूर : देशातील सायबर गुन्हेगारीसाठी कुप्रसिद्ध झारखंड राज्यातील जमतारा येथील एका आरोपीला सोलापूर ग्रामीण पोलिसांच्या सायबर सेलने कर्नाटकच्या बंगळुरू येथून ताब्यात घेतले.
सोलापूर तालुका पोलीस ठाण्याच्या हद्दीतील उमेश काशिनाथ पाटील यांनी धूप स्टँडची ऑनलाईन ऑर्डर केली होती. धूप स्टँड डिलीव्हरीसाठी आला असता त्याने तुमचे पार्सल परत गेले असून ते घेण्यासाठी पाच रुपये अतिरिक्त चार्जेस लागतील त्यासाठी फोन पे करण्यास सांगितले. पाटील यांनी फोन पे केल्यानंतर त्यांच्या अकाऊंटमधून लगेच 90 हजार रुपये कट झाले. त्यांना फसवणूक झाल्याचे लक्षात येताच त्यांनी ग्रामीण सायबर सेलशी संपर्क साधून गुन्हा दाखल केला.
सेलने तपासात कॉल रेकॉर्ड तपासणी, डिजिटल पुरावे व उत्कृष्ट दर्जाचे सायबर विश्लेषण करून, आरोपीच्या हालचालींचा मागोवा घेण्यासाठी ऑनलाईन व्यवहार आणि मोबाईल लोकेशन ट्रॅकिंगचा वापर केला. त्यातून झारखंड राज्यातील जमतारा येथील आरोपी समशुल बदुलुमीया अन्सारी (वय 26) याला कर्नाटकातील बंगळुरू परिसरातील कोलार येथे सापळा लावून शिताफीने अटक केली. त्याच्याकडून फसवणुकीतील 90 हजार रुपये हस्तगत केले.