Pandharpur News
पंढरपूर : विठुरायाच्या दर्शनासाठी आलेल्या तीन महिला भाविकांचा चंद्रभागा नदीमध्ये बुडून दुर्दैवी मृत्यू झाला. ही घटना शनिवारी सकाळी सात वाजता सुमारास घडली. यातील दोन महिला भाविक जालनामधील आहेत. तर एका महिलेची ओळख पटलेली नाही.
विठुरायाच्या दर्शनासाठी आलेल्या महिला भाविकांची दर्शनाची आस अधुरीच राहिली. सदर महिला दर्शनाआधी चंद्रभागेत स्नान करण्यासाठी पाण्यात उतरल्या असता काळाने त्यांच्यावर घाला घातला. जालन्याच्या भोकरदन तालुक्यातील धावडा गावच्या दोन महिला भाविक आणि एक अनोळखी महिला भाविक आज सकाळी पुंडलिक मंदिराजवळ स्नान करण्यासाठी पाण्यात उतरल्या होत्या. त्यांना पाण्याचा अंदाज आला नसल्याने तिघीही पाण्यात बुडल्या. काही भाविकांच्या लक्षात येताच त्यांनी आरडाओरडा केला. या महिलांना वाचवण्याचा प्रयत्नदेखील केला. मात्र पाण्याचा प्रवाह वेगात असल्याने तिन्हीही महिला बुडाल्या. सुनीता सपकाळ (वय ४३) आणि संगीता सपकाळे (४०) या दोन महिला भोकरदन तालुक्यातील धावडा गावच्या रहिवासी आहे.
पंढरपूर प्रशासनाने चंद्रभागा नदीत आपत्कालीन परिस्थितीसाठी एक बोट आणि काही कर्मचारी दिल्याचा दावा केला होता. पण प्रत्यक्षात नदीत कोणतीही आपत्कालीन व्यवस्था उपलब्ध करण्यात आलेली नाही. आज सकाळी नदीतील कोळी बांधवांनी या बुडालेल्या महिलांचे मृतदेह बाहेर काढण्याचे काम केले.