सातारा : पुढारी वृत्तसेवा
जालना येथून अंगापूर येथे गोशाळेस जनावरे घेऊन जाणारे ट्रक बजरंग दलाच्या कार्यकर्त्यांनी वाढे फाटा ते खेड फाटादरम्यान अडवले. यावेळी एका ट्रकची तोडफोड करण्यात आल्याने गोंधळाची परिस्थिती निर्माण झाली. काही काळ या मार्गावरील वाहतूक ठप्प झाली होती.
अंगापूर येथे असणार्या गोशाळेस जालना येथून जनावरे आणण्यात आली होती. यात एकूण पाच ट्रक होते. त्यातील दोन ट्रक हे सातारच्या हद्दीत सायंकाळी 6 च्या सुमारास दाखल झाले. संबंधित ट्रक हे वाढे फाटा ते खेड फाटा यादरम्यान असताना बजरंग दलाच्या कार्यकर्त्यांनी ते थांबवले. ट्रकमध्ये जनावरे वाहतूक सुरू असल्याने वाहतूक करणार्या वाहन चालकाला बजरंग दलाच्या कार्यकर्त्यांनी प्रश्न विचारले. त्यावर या चालकाने उलट उत्तरे दिल्यामुळे बजरंग दलाच्या कार्यकर्त्यांनी आक्रमक होत (एमएच 12 जेएफ 2828) हा ट्रक फोडला. यावेळी महामार्गावर ट्रॅफिक जाम होऊन गोंधळाची परिस्थिती निर्माण झाली. थोड्या वेळात पोलिस घटनास्थळी दाखल झाल्यानंतर हा तणाव निवळला व वाहतूक सुरळीत झाली.