रायगड : आगामी होळी व धुळीवंदन या सणांच्या अनुषंगाने कोकणात जाणाऱ्या वाहनांमध्ये मोठी वाढ होणार आहे. शनिवार व रविवार अशी जोडून सार्वजनिक सुट्टी आल्याने मुख्य मार्गांवर प्रचंड गर्दी होण्याची शक्यता आहे. या पार्श्वभूमीवर जिल्हा प्रशासनाने 28 फेब्रुवारी ते 2 मार्च दरम्यान तीन दिवस ठराविक वेळेत महामार्गावरील इंदापूर-माणगाव आणि अलिबग-सहाण बायपास -रेवदंडा मार्गावर जड-अवजड वाहनांना बंदी करण्यात आली आहे.
आगामी होळी व धुळीवंदन या सणांच्या अनुषंगाने कोकणात जाणारे कोकणवासीय हे आपआपली वाहने घेवुन तसेच एस.टी. बसेस, खाजगी बसेसने मोठ्या प्रमाणात मुंबई-गोवा व खोपोली-पाली-निजामपूर-माणगाव-महाड असे जाणार आहेत. तसेच शनिवार व रविवार अशी जोडून सार्वजनिक सुट्टी आल्याने जिल्हा वाहतूक शाखा रायगडकडून मुंबई-गोवा महामार्ग तसेच वडखळ ते अलिबाग- रेवदंडा-मुरूड कर्जत, खोपोली व इतर मार्गावर वाहतूक कोंडी होवू नये याकरीता बंदोबस्ताचे नियोजन करण्यात आलेले आहे.
होळी व धुळीवंदन या उत्सवा दरम्यान वाहतुक कोंडी होवु नये म्हणून सदर मार्गावर जिल्हा वाहतुक शाखेकडून 4 अधिकारी व 70 वाहतुक पोलीस अंमलदार तसेच 50 होमगार्ड व समाजसेवी संघटनेचे 50 सेवक असे रहदारीच्या ठिकाणी वरील मार्गावर लावण्यात येणार आहेत. तसेच पोलीस ठाणेकडील जास्तीत जास्त अंमलदार देखील वाहतुक नियमनाकरीता लावण्यात येणार आहेत. मुंबई-गोवा महामार्ग हा इंदापूर माणगांव या ठिकाणी मोठया वाहतूककोंडी होत असल्याने नागरीकांनी खोपोली-पाली-निजामपूर-माणगाव-महाड या मार्गाचा अवलंब करावा, असे आवाहन करण्यातआले आहे.
अलिबाग-कुरूळ-सहाण-बायपास-रेवदंडा या मार्गाचे काम चालू असल्याने वाहतूक कोंडी होत आहे. या करीता उपाय योजना म्हणून जिल्हाधिकारी कार्यालयाकडून अवजड वाहने बंदी आदेश दररोज सकाळी 9 ते 12 व सायंकाळी 5 ते 7 वाजेपर्यंत नोटीफिकेशन काढण्यात आलेले आहे. तसेच रेवदंडा व मुरूडकडे जाणा-या पर्यटकांनी नागोठणे मार्ग भिसे खिंड-रोहा-चणेरा मार्ग रेबदंडा-मुरूड, कोलाड रोहा-चणेरा मार्गे रेवदंडा-मुरूड या पर्यायी मार्गाचा वापर करणेबाबत आवाहनात्मक बोर्ड वडखळ, नागोठणे, कोलाड, रोहा रेवदंडा मुरूड येथे लावण्यात येणार आहेत.
मुख्य मार्ग : मुंबई-गोवा महामार्ग हा इंदापूर-माणगांव
पर्यायी मार्ग : खोपोली-पाली-निजामपूर-माणगाव-महाड
मुख्य मार्ग :अलिबाग-कुरूळ-सहाण-बायपास-रेवदंडा
पर्यायी मार्ग : नागोठणे मार्गे भिसे खिंड-रोहा-चणेरा मार्गे रेवदंडा-मुरूड
: कोलाड-रोहा-चणेरा मार्गे रेवदंडा-मुरूड