Pali Dirty Water Supply: अष्टविनायक क्षेत्रातच गढूळ पाण्याचा पुरवठा! अंबा नदीचे पाणी थेट घराघरांत; शुद्धीकरण योजनेची प्रतीक्षा

संतोष उतेकर

सुधागड: अष्टविनायक तीर्थक्षेत्र पाली शहराला अशुद्ध व गढूळ पाण्याचा पुरवठा होत असून शुद्ध पाणीपुरवठा योजनेची प्रतीक्षा कायम आहे. पाऊस थांबल्याने अंबा नदीचे पाणी प्रचंड गढूळ झाले आहे.

पालीकरांना थेट अंबा नदीतून कोणतीही शुद्धीकरण प्रक्रिया न करता पाणी पुरवले जाते. नदीत सोडण्यात येणारे सांडपाणी, कंपन्यांचे प्रदूषित पाणी, कचरा आणि वाळू उपसामुळे पाणी दूषित झाले असून नागरिक व जीवसृष्टीचे आरोग्य धोक्यात आले आहे.

सध्या येणारे पाणी इतके गढूळ आहे की त्यातून अंघोळ काय तर कपडे व भांडी सुद्धा घासले जाऊ शकत नाही. पिण्यासाठी वापरणे तर दुरूच. वितरित होणाऱ्या पाण्यावर क्लोरीनेशन किंवा कोणतीही प्रक्रिया होत नसल्याने कित्येक वर्षे नागरिकांच्या आरोग्याशी खेळ सुरू आहे.

हजारो नागरिक आणि दररोज येणारे हजारो भाविक यांना नाईलाजाने हेच दूषित पाणी वापरावे लागते. नळांतून अनेकदा जिवंत साप, खुबे, शिंपले, मासे, किडे, तसेच गाळ आणि शेवाळ बाहेर येण्याचे प्रकार घडत आहेत.

योजना लालफितीती

१९७४ मध्ये मंजुरी मिळालेल्या या योजनेचा खर्च आता २५ कोटींवर पोहोचला आहे. राजकीय हेवेदावे आणि प्रशासकीय लालफितीत ही योजना अडकली आहे. दर निवडणुकीत राजकीय पक्षांचे नेते व मंत्री आश्वासन देतात, मात्र परिस्थिती 'जैसे थे'च आहे.

२००८-०९ च्या सर्व्हेनुसार ७ कोटी ७९ लाखांच्या निधीतून ही योजना आखली होती. पुढे 'क' दर्जा तीर्थक्षेत्रामुळे १० टक्के लोकवर्गणीची अट शिथिल झाली. २०२२ मध्ये नगरपंचायतीची स्थापना झाल्यानंतर २५ कोटींचा नवा प्रस्ताव पाठवण्यात आला आहे. मात्र अजून तो लालफितीत आहे.