महाड; पुढारी वृत्तसेवा : जनकल्याण रक्तपेढी येथून बिथरलेल्या रेड्याने चांभार खिंड पर्यंत धाव घेताना वाटेतील तीन वाहनांना ठोकर देऊन सहा नागरिकांना जखमी केले होते. ही घटना आज (दि. ८) सकाळी साडेअकराच्या सुमारास घडली. दरम्यान, या रेड्याला पाच तासांच्या प्रयत्नानंतर पकडण्यात वनखाते, आरोग्य विभाग, पशु विभाग, पोलिसांना यश आले.
रेडा चांभार खिंड परिसरातील डोंगरामध्ये फिरत असल्याची माहिती प्राप्त झाल्यानंतर विविध विभागांनी संयुक्तरित्या केलेल्या मोहिमेमध्ये रेड्याला पकडण्यात यश आले. त्याच्यावर पशुवैद्यकीय अधिकाऱ्यांकडून उपचार केले जाणार आहेत. दरम्यान, रेड्याने जखमी केलेल्या सहापैकी तीन जणांच्या जखमा गंभीर असल्याचे सांगितले जात आहे.
महाडमधील मोकाट जनावरांचा प्रश्न पुन्हा एकदा ऐरणीवर आला आहे. अशा मोकाट फिरणाऱ्या जनावरासंदर्भात नगरपालिका प्रशासनाने तातडीने कार्यवाही करावी, अशी मागणी नागरिकांकडून होत आहे.