Kashedi Ghat old road damaged
पोलादपूर : धनराज गोपाळ
मुंबई-गोवा महामार्गावरील कशेडी घाटात जुन्या महामार्गावर भोगाव हद्दीत रस्त्यावर भेगा पडल्याने पावसाळ्यात दरड कोसळून मोठी दुर्घटना घडण्याची शक्यता वर्तवली जात आहे.
मुंबई-गोवा महामार्गावरील कशेडी घाटात बोगदा मार्गे चौपदरीकरणाचे काम करण्यात आले आहे. यावेळी भोगाव गावाच्या हद्दीत डोंगरांचे उत्खनन करून डोंगर कापण्यात आले. नवीन महामार्ग बोगदा मार्गे वळवण्यात आला. याच ठिकाणी जवळच भोगाव हद्दीत जुन्या मार्गावरील रस्त्याला पाच ते दहा मिटर अंतरावर मोठ्या प्रमाणात भेगा पडल्याने येत्या पावसाळ्यात येथील रस्ता खचून नवीन महामार्गावर दरड कोसळून मोठा अनर्थ घडण्याची शक्यता वर्तवली जात आहे.
जुन्या महामार्गावर रस्त्याला भेगा पडलेल्या ठिकाणी खालील बाजूस जवळूनच नवीन महामार्ग गेला आहे. त्यामुळे भेगा पडलेला रस्ता खचल्यास नवीन महामार्गावर दरड कोसळण्याची शक्यता आहे. संबंधित महामार्ग प्रशासनाकडून वेळीच दखल घेऊन तात्काळ उपाय योजना करणे गरजेचे बनले आहे. अन्यथा या ठिकाणी मोठा अनर्थ घडू शकतो अशी शक्यता वर्तवण्यात येत आहे.
सद्यस्थितीत कशेडी घाटातील वाहतूक बोगदा मार्गे होत आहे. जुन्या महामार्गावर तुरळक वाहतूक सुरू आहे. यामुळे वाहतुकीला कोणताही अडथळा नसला तरी भविष्यात किंवा पावसाळ्यात बोगद्या मार्गे काही अनुचित प्रकार घडल्यास पर्यायी मार्ग म्हणून कशेडी घाटातील जुन्या महामार्गावरून वाहतूक वळवावी लागणार आहे.