Tilak Road Ganesh Visarjan tank arrangement
पुणे: टिळक मार्गावरून येणार्या गणेश मंडळांसाठी लकडी पूल, विठ्ठल मंदिर, भारती भवन परिसरात स्वतंत्र हौदांची व्यवस्था करण्यात येईल तसेच या मार्गावरून येणार्या मंडळांसाठी टिळक चौकातील मुख्य स्वागत मंडप मागच्या बाजूने खुला ठेवून मंडळांचे स्वागत करण्याच्या मागणीवर सकारात्मक आहोत, असे आश्वासन महापालिका आयुक्त नवलकिशोर राम यांनी दिले.
‘पुढारी गणेशोत्सव व्यासपीठा’वर गणेश मंडळांच्या प्रतिनिधींनी उपस्थित केलेल्या प्रश्नांवर आयुक्त ‘पुढारी’च्या प्रतिनिधीशी बोलत होते. (Latest Pune News)
टिळक रस्ता विसर्जन मिरवणूक समन्वय समिती व विविध मंडळांच्या कार्यकर्त्यांची बैठक नुकतीच ‘पुढारी’ने घेतली होती. या बैठकीत अनेक मागण्या गणेश मंडळांनी मांडल्या. याबाबत ‘पुढारी’च्या प्रतिनिधीने आयुक्त नवल किशोर राम यांची भेट घेतली असता मंडळांच्या मागण्यांबाबत सकारात्मक असल्याचे आयुक्त नवल किशोर राम म्हणाले.
‘पुढारी गणेशोत्सव व्यासपीठा’वर विविध मंडळांच्या कार्यकर्त्यांनी त्यांना येणार्या अडचणी आणि समस्या मांडल्या. अलका टॉकीज चौकात गणेश मंडळांचे मिरवणूक रथ थांबवून विसर्जनास जाताना जास्तीचे अंतर चालत जावे लागते.
यामुळे लकडी पूल, विठ्ठल मंदिर, किवा भारती भवन परिसरात विसर्जनाच्या दिवशी टिळक रस्त्यावरून येणार्या गणेश मंडळासाठी स्वतंत्र विसर्जन हौदाची व्यवस्था करण्यात यावी, अशी मागणी केली होती. या सोबतच या मार्गावर जेधे चौक, हिराबाग चौक, अभिनव चौक, एसपी कॉलेज चौक, न्यू इंग्लिश स्कूल चौक यांसारख्या महत्त्वाच्या ठिकाणी पुरेशी प्रकाशव्यवस्था करण्यात यावी, या मार्गावर महिलांसाठी हे स्वच्छतागृह उभारण्यात यावे, अशी देखील मागणी मंडळांनी केली होती.
टिळक चौकात उभारण्यात येणारा स्वागत कक्ष हा दोन्ही बाजूने खुला असावा, तसेच टिळक रस्त्यावरील साहित्य परिषदेबाहेर योग्य व्यवस्था असावी या मागणीबाबतही आयुक्त सकारात्मक आहेत.
टिळक चौकातील मुख्य स्वागत कक्ष दोन्ही बाजूने खुला ठेवू
पुढारी व्यासपीठावर गणेश मंडळांनी अलका चौकातील मुख्य स्वागत कक्ष हा टिळक रस्त्यावरून येणार्या मंडळांसाठी दोन्ही बाजूने खुला ठेवण्याच्या मागणीवर आयुक्त नवलकिशोर राम यांनी सकारात्मक भूमिका घेत याबाबत योग्य निर्णय घेण्याचे आश्वासन दिले. यासोबतच टिळक रस्त्यावरील मोकळ्या जागेत फूड मॉल उभारण्यासंदर्भात योग्य निर्णय घेण्यात येईल, असे देखील आयुक्त नवलकिशोर राम म्हणाले.