पुणे : पुढारी वृत्तसेवा : ससूनमधील ड्रग प्रकरणात पोलिसांप्रमाणे ससूनमधील अधिकारी, कर्मचार्यांचेही 'अर्थ'पूर्ण संबंध असल्याची चर्चा आहे. राज्य शासनाने नेमलेल्या समितीने ससूनला भेट देऊन कसून चौकशी करून दिवसभर जबाब नोंदवून घेतले. त्यामुळे 'त्या' अधिकारी, कर्मचार्यांच्या अडचणींमध्ये वाढ होणार आहे. ससूनमधून ड्रग प्रकरणातील आरोपी ललित पाटील पळून गेल्यानंतर तब्बल 11 दिवसांनी राज्य शासनाला जाग आली आणि प्रकरणाची सखोल चौकशी करण्यासाठी विशेष समिती नेमण्यात आली. समितीतील सदस्यांनी शुक्रवारी ससून रुग्णालयाला भेट दिली. आरोपी कसा पळाला, त्याला कोणी मदत केली, मुळात तो इतके दिवस का अॅडमिट होता, अशा अनेक प्रश्नांची उत्तरे जाणून घेण्याचा प्रयत्न केला.
समितीचे सदस्य दिवसभर ससून रुग्णालयामध्ये ठाण मांडून होते. त्यांनी कैद्यांच्या वॉर्ड क्रमांक 16 मध्येही भेट दिली. कैद्यांची कशाप्रकारे बडदास्त ठेवण्यात येते, त्यांच्यावर कशा पध्दतीने उपचार केले जातात, अशा अनेक निकषांचा अभ्यास करत सखोल माहिती जाणून घेतली. अधिष्ठाता डॉ. संजीव ठाकूर यांच्यासह कैद्यांवर उपचार करणारे डॉक्टर, वॉर्डशी संबंधित कर्मचारी असे तब्बल 80 जणांचे जबाब नोंदवून घेतले आहेत. कैदी रुग्णांना अॅडमिट करून घेतल्याची कारणे, आजारांचे निदान, उपचार, ते किती दिवस अॅडमिट होते, याबाबत कसून चौकशी केली.
राज्य शासनाने नेमलेल्या समितीने शुक्रवारी ससून रुग्णालयाला भेट दिली आणि कसून चौकशी केली. याबाबतचा अहवाल 15 दिवसांत राज्य शासनाला सादर केला जाणार आहे. गरज भासल्यास आम्ही पुन्हा एकदा ससून रुग्णालयाला भेट देऊ.
– डॉ. दिलीप म्हैसेकर, संचालक, वैद्यकीय शिक्षण आणि संशोधन संचालनालय
- ललित पाटीलला ससूनमध्ये कधी दाखल करून घेण्यात आले?
- त्याच्यावर कोणते डॉक्टर उपचार करीत होते?
- तो पळून कसा गेला?
- पळून जाण्यापूर्वी काय काय आणि कसे घडले?
- आरोपीला पळून जाण्यास कोणी मदत केली?
लोकल ते ग्लोबल बातम्यांसाठी डाऊनलोड करा दैनिक पुढारीचे Android आणि iOS मोबाईल App.
'Pudhari' is excited to announce the relaunch of its Android and iOS apps. Stay updated with the latest news at your fingertips.
Android and iOS Download now and stay updated, anytime, anywhere.