Supriya Sule on Ajit Pawar death
पुणे : उपमुख्यमंत्री आणि राष्ट्रवादी काँग्रेसचे नेते अजित पवार यांच्या विमान अपघातातील आकस्मिक निधनाने संपूर्ण राज्य हादरले आहे. या दुर्दैवी घटनेवर त्यांच्या बहीण आणि राष्ट्रवादी काँग्रेस (शरदचंद्र पवार) पक्षाच्या नेत्या सुप्रिया सुळे यांनी व्हॉट्सॲप स्टेटसद्वारे आपली भावना व्यक्त केली आहे.
अजित पवार यांचा विमान अपघातात मृत्यू झाल्याचे वृत्त मिळाल्यानंतर सुप्रिया सुळे यांनी व्हॉट्सॲप स्टेटसद्वारे 'उद्ध्वस्त..' अशी भावना व्यक्त केली आहे. त्यांनी एका शब्दामध्ये पवार कुटुंबीयांवर कोसळलेला दुःखाचा डोंगर स्पष्ट केला आहे.
२०२३ मध्ये अजित पवार यांनी शरद पवारांपासून फारकत घेतली. यानंतर राष्ट्रवादी काँग्रेस पक्षात फूट पडली. राजकीय मतभेद असूनही सुप्रिया सुळे यांनी नेहमीच अजित पवार हे माझे मोठे भाऊ असल्याचे सांगत वैयक्तिक संबंध जपले होते. "राजकारण आणि नाती यांची गल्लत होऊ नये. आमची लढाई ही वैचारिक आहे, वैयक्तिक नाही," असे सुळे यांनी वेळोवेळी स्पष्ट केले होते. नुकत्याच झालेल्या महापालिका निवडणुकीतही दोन्ही गट एकत्र लढले होते, ज्यातून कुटुंबातील एकोपा दिसून आला होता. मात्र, आजच्या या भीषण घटनेने पवार कुटुंबावर दुःखाचा डोंगर कोसळला आहे.
अजित पवार यांना घेऊन येणाऱ्या खासगी विमानाचा बारामती एमआयडीसी परिसरातील विमानतळावर उतरत असताना अपघात झाला. या दुर्घटनेत विमानातील सर्व सहा जणांचा मृत्यू झाला. जिल्हा परिषद निवडणुकीच्या पार्श्वभूमीवर बारामती तालुक्यात आज अजित पवार यांच्या चार प्रचारसभा होणार होत्या. त्यासाठी ते मुंबईहून सकाळी विमानाने बारामतीकडे रवाना झाले होते. विमान बारामती विमानतळावर उतरण्याच्या प्रक्रियेत असतानाच तांत्रिक बिघाड झाल्याची शक्यता वर्तवली जात आहे. मात्र, अपघाताचे नेमके कारण तपासाअंतीच स्पष्ट होईल, असे प्रशासनाकडून सांगण्यात आले.