सासवड: पुरंदर तालुक्यातील चिव्हेवाडी-सारणी बंधारा परिसरात पाणीटंचाईचे संकट गडद होण्याची चिन्हे दिसू लागली आहेत. त्यातच बंधाऱ्यातील पाण्याचा वीजपंपांच्या माध्यमातून अनिर्बंध उपसा होत असल्याचा गंभीर आरोप स्थानिक नागरिकांनी केला आहे.
उपलब्ध पाणीसाठ्याची काही जणांकडून लूट होत असल्याची तक्रार असून, प्रशासनाने वेळीच हस्तक्षेप करून कथित पाणीचोरी रोखावी, अशी मागणी ग्रामस्थांनी केली आहे. चिव्हेवाडी आणि देवडी या गावांसह परिसरातील वाड्या-वस्त्यांच्या पिण्याच्या पाण्याचा प्रमुख आधार सारणी बंधाऱ्यातील पाणीसाठा आहे.
त्यामुळे या साठ्यात घट झाल्यास नागरिकांच्या पिण्याच्या पाण्याबरोबरच जनावरांच्या पाण्याचाही गंभीर प्रश्न निर्माण होण्याची भीती व्यक्त होत आहे. उन्हाची तीव्रता वाढल्यानंतर पाण्याची मागणी आणखी वाढणार असल्याने उपलब्ध साठ्याचे आतापासूनच काटेकोर नियोजन करणे आवश्यक आहे.
वीजपंपांद्वारे अनिर्बंध उपसा?
बंधारा परिसरात काही ठिकाणी मोठ्या क्षमतेचे वीजपंप बसवून मोठ्या प्रमाणावर पाणी उपसा केला जात असल्याचा आरोप स्थानिक नागरिकांनी केला आहे. या उपशावर नियंत्रण नसल्यास बंधाऱ्यातील उपलब्ध पाणीसाठा वेगाने कमी होण्याची शक्यता आहे. परिणामी, गावांचा नियोजित पाणीपुरवठा विस्कळीत होऊन आगामी काळात पिण्याच्या पाण्यासाठी ग्रामस्थांना भटकंती करावी लागू शकते.
कारवाईकडे लक्ष
प्रशासनाने केवळ पाणीवाटपाचे नियोजन न करता बंधारा परिसरातील प्रत्यक्ष पाणीउपशाची तपासणी करावी. उपलब्ध पाणीसाठा गावांच्या पिण्याच्या पाण्यासाठी सुरक्षित ठेवून अनधिकृत उपशावर नियंत्रण आणावे. अन्यथा आगामी उन्हाळ्यात चिव्हेवाडी, देवडीसह परिसरातील वाड्या-वस्त्यांना तीव्र पाणीटंचाईचा सामना करावा लागू शकतो. त्यामुळे प्रशासन आता नेमकी कोणती भूमिका घेते, याकडे ग्रामस्थांचे लक्ष लागले आहे.