पुणे: येरवडा कारागृहात तंबाखू मागण्यावरून कैद्यांमध्ये वाद झाला. या वेळी दोन कैद्यांनी एका कैद्याला मारहाण केली. याप्रकरणी येरवडा पोलिसांनी अजय शंकर राठोड, संतोष सुरेश भालेराव या दोन कैद्यांच्या विरुद्ध गुन्हा दाखल केला आहे.
याबाबत वरिष्ठ कारागृह अधिकारी रेवणनाथ कानडे यांनी फिर्याद दिली आहे. तर शुभम पंढरीनाथ पोखरकर असे जखमी कैद्याचे नाव आहे. ही घटना बुधवारी (दि. 27) सकाळी आठ वाजेच्या सुमारास सर्कल क्रमांक दोन, बॅरेक क्रमांक सहामधील बाहेरील बाजूला असलेल्या सार्वजनिक शौचालयाशेजारील पाण्याच्या हौदाजवळ घडली आहे.
पोलिसांनी दिलेल्या माहितीनुसार, येरवडा कारागृहातील सर्कल क्रमांक दोन परिसरातील बराकीच्या परिसरात स्वच्छतागृह आहे. बुधवारी (दि. 27 मे) सकाळी सातच्या सुमारास शौचालयाच्या परिसरातील हौदाजवळ कैदी शुभम पोखरकर थांबला होता. तो स्वच्छतागृहात जात असताना राठोड आणि भालेराव यांनी पोखरकर याला अडवून तंबाखू मागितली.
तंबाखूवरून दोघांनी वाद घालून जेवण वाढण्यासाठी वापरले जाणारे छोटे माप आणि प्लास्टिकची बादली पोखरकर याच्या डोक्यात मारली. पोखरकर जखमी झाला. कैद्यांमधील हाणामारीचा प्रकार पाहून कारागृहातील रक्षकांनी तेथे धाव घेतली. राठोड आणि भालेराव यांना ताब्यात घेतले. याबाबत पोलिसांकडे तक्रार देण्यात आली.
पोलिस उपनिरीक्षक कुंदन सत्रे तपास करत आहेत. येरवडा कारागृहात कैद्यांमध्ये हाणामारीच्या घटना घडल्या आहेत. हाणामारीच्या घटना, तसेच गैरप्रकार रोखण्यासाठी कारागृहाच्या आवारात सीसीटीव्ही कॅमेरे बसविण्यात आले आहेत.