सुभाष किवडे
पुणे : मागणी कमी असून आवक मुबलक असल्यामुळे साखर आणि हलक्या प्रतीच्या गुळाच्या दरात आणखी घट झाली आहे. तूरडाळ आणि हरभरा डाळीच्या दरातही क्विंटलमागे शंभर ते दोनशे रुपयांनी घट झाली. मात्र, हंगाम अखेर असल्याने गावरान ज्वारीच्या दरात क्विंटलमागे पाचशे रुपयांनी वाढ झाली. थंडीमुळे मागणी वाढल्याने बाजरीच्या भावातही दोनशे रुपयांनी वाढ झाली. खाद्यतेले व इतर जिनसांचे सर्व दर स्थिर होते.
लवकरच नव्या तुरीची आवक सुरू होणार आहे. त्यामुळे विक्रीचा दबाव वाढला असून उठाव कमी झाला आहे. यामुळे तूरडाळीच्या दरात क्विंटलमागे दोनशे रुपयांनी घट झाली आहे. त्याचप्रमाणे हरभऱ्याची आयात सुरूच असल्यामुळे डाळीचे दरही आणखी दोनशे रुपयांनी उतरले आहेत. अन्य सर्व डाळींचे दर स्थिर होते.
ज्वारीचा नवा हंगाम लवकरच सुरू होणार आहे. मात्र, सध्या बाजारात भारी प्रतीच्या ज्वारीचा तुटवडा आहे. यामुळे गावरान ज्वारीच्या दरात क्विंटलमागे पाचशे रुपयांनी वाढ झाली आहे. वाढत्या थंडीमुळे बाजरीचा खप वाढला आहे. त्यामुळे, भारी प्रतीच्या बाजरीच्या दरात क्विंटलमागे दोनशे रुपयांनी वाढ झाली आहे. आवक-जावक साधारण असल्यामुळे सर्व प्रकारच्या मालाचे भाव स्थिर होते.
चालू महिन्यासाठी साखरेचा कोटा कमी प्रमाणात उपलब्ध करण्यात आला आहे. तरीही उठाव कमी असल्यामुळे भाव वाढण्याऐवजी सातत्याने कमी होत आहे. गेल्या आठवड्यात मागणी कमी असल्याने साखरेच्या भावात पन्नास रुपयांनी घट झाली आहे. गुळाचा हंगाम जोरात सुरू झाला असून गुऱ्हाळे जोमाने सुरू झाली आहेत. पुण्याच्या बाजारात हलक्या व मध्यम प्रतीच्या गुळाची आवक मोठ्या प्रमाणात होत आहे. या गुळास उठाव कमी असल्याने दरात आणखी दोनशे रुपयांनी घट झाली आहे. मात्र, भारी प्रतीच्या गुळाचे दर स्थिर होते. आवक-जावक कमी असल्यामुळे नारळ, पोहे, साबुदाण, मिरची या सर्व जिनसांचे दर स्थिर होते.
येथील घाऊक बाजारातील दर पुढीलप्रमाणे : साखर (प्रतिक्विंटल) 4050-4100 रु. खाद्यतेले (15किलो/लिटर):- शेंगदाणा तेल 2375-2475, रिफाईंड तेल 2150-2750, सरकी तेल 2075-2375, सोयाबीन तेल 1900-2125, पामतेल 1875-2075, सूर्यफूल रिफाईंड तेल 2075- 2250, खोबरेल तेल 6000 वनस्पती 1830-2080 रु. तांदूळ:- गुजरात उकडा 3500-4000, मसुरी 3500-4000, सोना मसुरी 4500-5000, एच.एम.टी. कोलम 5500-6500, लचकारी कोलम 6500-7000, चिन्नोर 4500-5000, 1121-11000- 11500, आंबेमोहोर (सुवासिक) 15000-16000, बासमती अखंड 12000-13000, बासमती दुबार 9500-1000, बासमती तिबार 10000-10500, बासमती मोगरा 5500-6500, बासमती कणी 4000-4500, 1509-8500-9500, इंद्रायणी 5500-6000 रु. गहू - लोकवन नं. 1 4000-4200,
लोकवन नं. 2 3600-40020, नं.3 3300-3600, सिहोर नं. 1 5700-6000, सिहोरी 3800-4400, मिलबर 3100 रु. ज्वारी :- गावरान नं. 1 6200-6700, गावरान नं.2 5000-5700, नं.3 3500-3800, दूरी नं.1 3600-3800, दूरी नं. 2 3200-3500 रु बाजरी :- महिको नं.1 3900-4200, महिको नं.2 3300-3500, गावरान 3400-3700, हायब्रीड 3200-3500 रु. गूळ :- गूळ एक्स्ट्रा 4550-4650, गूळ नं. 1 4400-4700, गूळ नं.2 4100-4300 गूळ नं.3 3900- 4050, नं. 4 - 3500-3700, बॉक्स पॅकिंग 4000-5100 रु. डाळी :- तूरडाळ 9500-11000, हरभराडाळ 7100-7200, मूगडाळ 9700-9700, मसूरडाळ 7400- 7500, मटकीडाळ 8300-8400, उडीदडाळ 10000-10400 रु. कडधान्ये :-हरभरा 6500-6600, हुलगा 4800-5000 चवळी 7000-9500, मसूर 6900-7000, मूग 9000-9200, मटकी गावरान 12000, मटकी पॉलिश 6800-7000, मटकी गुजरात 6800-7000, मटकी राजस्थान 6800-7000, मटकी सेलम 15000-15000, वाटाणा हिरवा 13000-14000, वाटाणा पांढरा 4400-4500, काबुली चणा 7500-11000 रु.