पुणे: शहरातील रेडी मिक्स काँक्रीट (आरएमसी) प्रकल्पांमुळे वाढलेल्या प्रदूषणाच्या तक्रारींची दखल घेत महापालिका आयुक्त नवल किशोर राम यांनी स्वतः पुढाकार घेतला आहे. पुढील आठवड्यात ते महापालिका हद्दीतील विविध आरएमसी प्रकल्पांची प्रत्यक्ष पाहणी करणार असून, या दौऱ्यात महाराष्ट्र राज्य प्रदूषण नियंत्रण मंडळाचे अधिकारीही सहभागी होणार आहेत.
नियमांचे उल्लंघन करणाऱ्या प्रकल्पांवर पाहणीनंतर कठोर कारवाई केली जाणार असल्याचे स्पष्ट करण्यात आले आहे. वडगाव खुर्द, धायरी, बावधन, लोहगाव, उंड्री, शेवाळवाडी आदी भागांत मोठ्या प्रमाणात आरएमसी प्रकल्प उभे राहिले आहेत.
या प्रकल्पांमुळे परिसरात धूळ व प्रदूषणाचे प्रमाण वाढले असून, नागरिकांच्या आरोग्याचा प्रश्न गंभीर बनला आहे. काही ठिकाणी सिमेंटयुक्त राडारोडा व रासायनिक स्लरी थेट मुठा नदीत सोडली जात असल्याने नदीच्या पाण्याचा रंग बदलल्याची धक्कादायक बाब समोर आली आहे.
दरम्यान, आरएमसी प्रकल्पांवरील कारवाईचा मुद्दा गेल्या काही दिवसांत चांगलाच गाजला आहे. लोहगाव-खांदवेनगर परिसरातील सात प्रकल्पांवर महापालिकेने कारवाई केली होती. त्यानंतर वडगाव खुर्द येथील प्रकल्पांवर कारवाईचे नियोजन असतानाच ती माहिती लीक झाल्याने कारवाई रद्द केल्याचा प्रकार उघडकीस आला. या प्रकारामुळे नागरिकांमध्ये संताप व्यक्त होत असून, संबंधित अधिकाऱ्यावर कारवाईची मागणी जोर धरत आहे.
आरएमसी प्रकल्पांची आवश्यकता मान्य असली तरी ते नियमांनुसारच चालले पाहिजेत. नागरिकांना त्रास होणार नाही, यासाठी प्रदूषण नियंत्रणाच्या सर्व निकषांचे पालन आवश्यक आहे. त्यामुळे प्रत्यक्ष पाहणी करून नियमभंग करणाऱ्यांवर कारवाई केली जाईल.नवल किशोर राम, आयुक्त, महापालिका