PMPML Chief Mahesh Awhad Car Accident
पुणे : मुंबईहून पुण्याकडे येत असताना पीएमपीएमएलचे अध्यक्ष व व्यवस्थापकीय संचालक महेश आव्हाड यांच्या वाहनाला मळवली परिसरात भीषण अपघात झाला. या अपघातात वाहनचालक आणि बॉडीगार्ड गंभीर जखमी झाले असून त्यांच्यावर रुग्णालयात उपचार सुरू आहेत. सुदैवाने महेश आव्हाड यांना किरकोळ दुखापत झाली असून ते थोडक्यात बचावले आहेत.
अपघातानंतर बोलताना महेश आव्हाड यांनी सांगितले की, “नशीब बलवत्तर म्हणून आम्ही वाचलो. एका मोबाईल मिनी व्हॅन चालकाने अत्यंत बेशिस्तपणे रस्त्यात अचानक यू-टर्न घेतल्यामुळे आमच्या वाहनाचा भीषण अपघात झाला.”
या धडकेत वाहनाचे मोठ्या प्रमाणात नुकसान झाले असून गाडीचा पुढील भाग पूर्णपणे चुराडा झाल्याची माहिती मिळत आहे. अपघात इतका गंभीर होता की चालक आणि सुरक्षा रक्षकाला तातडीने रुग्णालयात दाखल करावे लागले.
महेश आव्हाड यांनीही या अपघातात किरकोळ मार लागल्याचे सांगितले. सध्या त्यांच्यावरही वैद्यकीय तपासणी आणि उपचार सुरू आहेत. अपघातानंतर काही काळ परिसरात वाहतुकीची कोंडी निर्माण झाली होती. स्थानिक नागरिक आणि पोलिसांच्या मदतीने जखमींना तातडीने उपचारासाठी हलवण्यात आले.
दरम्यान, या अपघातामुळे पुन्हा एकदा महामार्गावरील बेशिस्त वाहनचालकांचा मुद्दा ऐरणीवर आला आहे. अचानक यू-टर्न आणि वाहतुकीचे नियम न पाळल्यामुळे गंभीर अपघात घडत असल्याची चर्चा नागरिकांमध्ये सुरू आहे.