पुणे: विकेंडच्या काळात प्रवाशांची होणारी अतिरिक्त गर्दी कमी करण्यासाठी, मध्य रेल्वे पुणे विभागाने पुणे ते नागपूरदरम्यान विशेष शुल्कासह एक विशेष ट्रेन चालवण्याचा निर्णय घेतला आहे. या रेल्वेमुळे प्रवाशांना मोठा दिलासा मिळणार आहे.
रेल्वे प्रशासनाने दिलेल्या माहितीनुसार, ट्रेन क्रमांक 01467 /01468 पुणे-नागपूर-पुणे सुपरफास्ट या दोन्ही विशेष गाड्यांची आठवड्याला प्रत्येकी एक फेरी होणार आहे. तसेच, ट्रेन क्रमांक 01467 पुणे-नागपूर विशेष शुक्रवार दिनांक 23 जानेवारी 2026 रोजी पुण्यातून दुपारी 3 वाजून 50 मिनिटांनी सुटेल आणि दुसऱ्या दिवशी 6 वाजून 30 मिनिटांनी नागपूर येथे पोहोचेल.
तसेच, ट्रेन क्रमांक 01468 नागपूर-पुणे विशेष शनिवार दिनांक 24 जानेवारी 2026 रोजी नागपूर येथून सकाळी 8 वाजता सुटेल आणि त्याच दिवशी रात्री 11 वाजून 30 मिनिटांनी पुणे येथे पोहोचेल.
दरम्यान, ही गाडी उरुळी, दौंड कॉर्ड लाइन, अहिल्यानगर, बेलापूर, कोपरगाव, अंकाई, मनमाड, जळगाव, भुसावळ, मलकापूर, शेगाव, अकोला, बडनेरा, धामणगाव आणि वर्धा या ठिकाणी थांबे घेईल, या गाडीमध्ये एकूण 20 डबे असणार आहेत.
2 वातानुकूलित 2-टायर, 4 वातानुकूलित 3-टायर, 8 स्लीपर क्लास, 4 सामान्य द्वितीय श्रेणी, 1 जनरेटर व्हॅन आणि 1 गार्ड बेक व्हॅन, अशी डब्यांची संरचना असणार आहे. या सेवेचा प्रवाशांनी लाभ घ्यावा, असे आवाहन रेल्वे प्रशासनाकडून करण्यात आले आहे.