पुणे: पावसामुळे पुणे बाजार समितीच्या गुलटेकडी मार्केट यार्डात राज्यासह परराज्यांतून फळभाज्यांची आवक कमी होत आहे. आवक कमी झाल्याने टोमॅटो, फ्लॉवर, वांगी, सिमला मिरची, शेवग्याच्या भावात गेल्या आठवड्याच्या तुलनेने दहा ते वीस टक्क्यांनी वाढ झाली होती. अन्य सर्वच फळभाज्यांचे भाव मागील आठवड्याच्या तुलनेने स्थिर होते.
गुलटेकडी मार्केट यार्डात रविवारी (दि.1) राज्याच्या विविध भागांसह परराज्यांतून सुमारे 90 ते 100 ट्रक फळभाज्यांची आवक झाली. परराज्यांतून झालेल्या आवकमध्ये कर्नाटक, गुजरात, उत्तरप्रदेश येथून हिरवी मिरची सुमारे 15 ते 16 टेम्पो, कर्नाटक आणि गुजरात येथून कोबी 4 ते 5 टेम्पो, कर्नाटक आणि हिमाचल प्रदेश येथून घेवडा 3 ते 4 टेम्पो, इंदोर येथून गाजर 4 ते 5 टेम्पो, आंध्र प्रदेश आणि तामिळनाडू येथून शेवगा 2 ते 3 टेम्पो, हिमाचल प्रदेश 5 टेम्पो मटार, कर्नाटक येथून 2 टेम्पो भुईमूग शेंग, आंध्रप्रदेश आणि तामिळनाडू येथून कैरी 3 ते 4 टेम्पो, मध्यप्रदेश येथून लसणाची सुमारे 9 ते 10 टेम्पो तर इंदौर, आग्रा, स्थानिक भागातून बटाटा 50 टेम्पो इतकी आवक झाली होती. (Latest Pune News)
स्थानिक भागातून झालेल्या आवकमध्ये सातारी आले सुमारे 550 ते 600 गोणी, भेंडी 5 ते 6 टेम्पो, गवार 3 टेम्पो, टोमॅटो 4000 क्रेट, हिरवी मिरची 3 ते 4 टेम्पो, काकडी 8 ते 10 टेम्पो, फ्लॉवर 8 टेम्पो, कोबी 5 ते 6 टेम्पो, ढोबळी मिरची 7 ते 8 टेम्पो, गाजर 2 टेम्पो, भुईमूग शेंग 100 गोणी, तांबडा भोपळा 14 ते 15 टेम्पो, कांदा सुमारे 150 टेम्पो इतकी आवक झाली होती, अशी माहिती मार्केट यार्डमधील ज्येष्ठ अडतदार विलास भुजबळ यांनी दिली.
सर्वच पालेभाज्यांचे भाव तेजीत
पावसामुळे पालेभाज्यांचे प्रंचड नुकसान झाले आहे. बाजारात पालेभाज्यांची आवक रोडावली आहे. त्यामुळे सर्व प्रकारच्या पालेभाज्यांच्या भावात वीस ते तीस टक्के वाढ झाली होती. गुलटेकडी मार्केट यार्डातील घाऊक बाजारात रविवारी (दि.1) कोथिंबिरीची सुमारे 70 हजार जुडी तर मेथीची 20 हजार जुडींची आवक झाली होती.
अवकाळी पावसाने अनेक शेतकर्यांचे नुकसान झाले आहे. त्याचा सर्वच पालेभाज्यांवर परिणाम झाल्याचे दिसून येत आहे. बाजारात येणार्या पालेभाज्यांची प्रत खालावलेली आहे. ग्राहकांनी खराब मालाकडे पाठ फिरवली आहे.