तळेगाव स्टेशन; पुढारी वृत्तसेवा: तळेगाव दाभाडे येथे मावळ तालुका सकल हिंदू समाजाच्या वतीने हिंदू जनगर्जना मोर्चा आज (दि.१२) काढण्यात आला. गोहत्या, लव्ह जिहाद, धर्मांतर विरोधी कायदा राज्यासह संपूर्ण देशात लागू करावा, धर्मवीर छत्रपती संभाजी महाराजांचा बलिदान दिन (फाल्गुन अमावस्या) धर्मवीर दिन म्हणून घोषित करण्यात यावा, अशा मागण्या यावेळी करण्यात आल्या.
वतननगर येथील श्री संतोषीमाता मंदिरापासून या मोर्चाला सुरूवात झाली. मोर्चात राम कृष्ण हरी… जय श्रीराम…हर हर महादेव…पवनपुत्र हनुमान की जय… जय भवानी, जय शिवाजी…छत्रपती शिवाजी महाराज की जय…धर्मवीर छत्रपती संभाजी महाराज की जय… भारत माता की जय… असा जयघोष करण्यात येत होता. नागरिक हातात भगवे झेंडे आणि भगव्या टोप्या परिधान करून मोर्चात सहभागी झाले होते. महिलांचा सहभागही लक्षणीय होता. लहान मुले, तरुणवर्ग, ज्येष्ठ नागरिकही मोठ्या संख्येने सहभागी झाले होते. तर या मोर्चात आमदार नितेश राणे, संजय (बाळा) भेगडे, गणेश भेगडे, रविंद्र भेगडे, रविंद्र माने आदी मान्यवर सहभागी झाले होते.
तळेगाव स्टेशन चौक, गाव भाग, जिजामाता चौक, राजेंद्र चौक, बाजार पेठेतून श्री मारुती चौक येथे मोर्चा आला. तेथे जाहीर सभा घेण्यात आली. आमदार नितेश राणे, मृणालिनी पडवळे, सुनील शास्री महाराज यांनी मनोगत व्यक्त केले. यावेळी कालीचरण महाराज यांनी शिवतांडव स्तोत्र गायन केले.
हेही वाचा