पुणे: कृषी उत्पन्न बाजार समितीच्या गुलटेकडी मार्केट यार्डातील तरकारी विभागात राज्यासह परराज्यातून फळभाज्यांची आवक घटली आहे. रविवारी (दि. 18) राज्याच्या विविध भागांसह परराज्यांतून मिळून सुमारे 100 ट्रक फळभाज्यांची आवक झाली. मागील आठवड्याच्या तुलनेत आवक 25 ट्रकने रोडावली.
बाजारात दाखल होत असलेल्या मालाच्या तुलनेत मागणी कमी असल्यामुळे बटाटा, टोमॅटो, लसूण आणि शेवगाच्या भावात दहा ते वीस टक्क्यांनी घट झाली आहे. मागणी आणि पुरवठा यातील समतोलामुळे उर्वरित फळभाज्यांचे भाव मागील आठवड्याच्या तुलनेत स्थिर आहेत.
परराज्यांतील कर्नाटक, आंध्रप्रदेश, गुजरात आणि मध्यप्रदेश येथून हिरवी मिरची सुमारे 15 टेम्पो, कर्नाटक येथून कोबी 4 टेम्पो, आंध्र प्रदेश आणि तामिळनाडू येथून शेवगा 2 टेम्पो, राजस्थान येथून गाजर 15 टेम्पो, कर्नाटक येथून घेवडा 4 टेम्पो, कर्नाटक येथून भुईमूग 2 टेम्पो, मध्यप्रदेश आणि राजस्थान येथून मिळून मटार 25 टेम्पो, कर्नाटक येथून पावटा 3 टेम्पो, तामिळनाडू येथून तोतापुरी कैरी 1 टेम्पो, मध्यप्रदेश येथून लसणाची सुमारे 7 टेम्पो, तर इंदौर, आग्रा आणि स्थानिक भागातून मिळून बटाट्याची 50 टेम्पो आवक झाली.
राज्यासह स्थानिक भागातून झालेल्या आवकमध्ये सातारी आले सुमारे 400 गोणी, भेंडी 5 टेम्पो, कोबी आणि हिरवी मिरची प्रत्येकी 4 टेम्पो, गवार 3 टेम्पो, टोमॅटो 15 हजार क्रेटस, काकडी 7 टेम्पो, फ्लॉवर 10, ढोबळी 5 मिरची, तांबडा भोपळा 10 टेम्पो गाजर आणि घेवडा प्रत्येकी 3 टेम्पो, पावटा 4 टेम्पो, कांदा 150 टेम्पो आवक झाली.
कोथिंबीर, कांदापात, चुका, हरभरा गड्डीच्या दरात घसरण
मार्केट यार्डात पालेभाज्यांची आवक वाढली आहे. त्यातुलनेत मागणी कमी असल्यामुळे कोथिंबीर, कांदापात आणि हरभरा गड्डीच्या भावात घाऊक बाजारात जुडीमागेे प्रत्येकी पाच रुपयांनी घट झाली आहे. तर चुकाच्या भावात दोन रुपयांनी घसरण झाली आहे. मागणी आणि पुरवठा यातील समतोलामुळे उर्वरित पालेभाज्यांचे भाव मागील आठवड्याच्या तुलनेत स्थिर असल्याची माहिती व्यापाऱ्यांनी दिली. मागील रविवारी (दि. 11) कोथिंबिरीची 1 लाख जुडी आवक झाली होती. त्यामध्ये वाढ होऊन आज दीड लाख जुडी आवक झाली. तर मेथीची आवक स्थिर असून, 60 हजार जुडी नोंदविण्यात आली. मागील आठवड्यात भोगीमुळे वाढलेली हरभरा गड्डीची आवक घटली आहे. मागील आठवड्यात 50 हजार जुडीची आवक झालेल्या हरभऱ्याची आज 35 हजार जुडी आवक नोंदविण्यात आली. घाऊक बाजारात कोथिंबिरीच्या जुडीला दर्जानुसार 10 ते 15 रुपये भाव मिळत असल्याचे या वेळी सांगण्यात आले.