पुणे: गणेशोत्सवातील विसर्जन मिरवणुकीत शिस्त, सुरक्षितता आणि वाहतूक व्यवस्थेला प्राधान्य देत ढोल - ताशा फेडरेशन राज्यव्यापी महासंघ, महाराष्ट्राच्या पुणे शहर कार्यकारिणीने पथकांसाठी नियमावली जाहीर केली आहे. मिरवणुकीत टोल वादन न करण्यासह प्रत्येक वादकाकडे ओळखपत्र, ५० ढोल आणि १६ ताशांसह १५० ते २०० वादकांचा सहभाग आणि चार रांगांमध्ये ढोलवादन करण्याच्या सूचना केल्या आहेत.
कुमठेकर रस्ता आणि टिळक रस्त्यावर पथकांना मार्ग उपलब्ध करून देणे, लक्ष्मी रस्त्यावरील वाहतूक व्यवस्थेसाठी आवश्यक बंदोबस्त, तसेच गुलाल - भंडारा, वायुयुक्त सिलिंडर आणि इलेक्ट्रिक आतषबाजी (कोल्ड फायर) यावर निर्बंध घालण्याची मागणी महासंघाने केली आहे. याबाबत महासंघाचे अध्यक्ष पराग ठाकूर यांनी परिमंडळ १ चे पोलिस उपायुक्त कृषिकेश रावले यांना निवेदन दिले आहे.
नियमावलीनुसार प्रत्येक वादकाकडे संबंधित पथकाचे ओळखपत्र असणे बंधनकारक आहे. विसर्जन मिरवणुकीत ५० ढोल, १६ ताशे, ध्वज आणि झांज यांचा समावेश राहणार असून, १५० ते २०० वादक सहभागी होतील. ढोलवादन चार रांगांमध्ये करण्यात येणार असून, टोल वादन केले जाणार नाही. लक्ष्मी रस्ता ओलांडण्यासाठी कुंटे चौक तसेच गुरुजी तालीम मंडळ येथील मार्गाचा वापर करण्याच्या सूचना केल्या आहेत.
श्रीमंत दगडूशेठ हलवाई गणपती मंदिर येथून समाधान चौकाकडे पथकांना प्रवेश दिला जाणार नाही. मिरवणुकीदरम्यान ज्येष्ठ नागरिक, लहान मुले आणि महिलांना गर्दीतून मार्गस्थ होण्यासाठी पथकांनी सहकार्य करावे, असेही नियमावलीत नमूद केले आहे. मिरवणुकीत पथकांनी पोलिस प्रशासन आणि पत्रकारांना सहकार्य करावे, तसेच वाहतूक व्यवस्थेला अडथळा निर्माण होणार नाही, याची काळजी घ्यावी, अशी सूचना केली आहे.
लक्ष्मी रस्त्यावर येणाऱ्या मिरवणुकांसाठी योग्य वेळापत्रक आणि आवश्यक पोलिस बंदोबस्त, केळकर रस्त्यावर वाहनांच्या पार्किंगला मनाई, तसेच कुमठेकर रस्ता आणि टिळक रस्त्यावर पथकांना मार्ग उपलब्ध करून देण्याची मागणी महासंघाने केली आहे. विसर्जन मिरवणुकीदरम्यान पोलिस प्रशासनाला मदत करण्यासाठी गेली अनेक वर्षे महासंघाचे अनुभवी प्रतिनिधी उपलब्ध असतात. यंदाही हे प्रतिनिधी मिरवणुकीदरम्यान पोलिस प्रशासनाला सहकार्य करण्यासाठी उपस्थित राहणार असल्याचे महासंघाच्या वतीने शहराध्यक्ष अक्षय बलकवडे यांनी सांगितले आहे.