पुणे: अन्न व औषध प्रशासनाने (एफडीए) अन्न सुरक्षा आणि स्वच्छतेच्या नियमांचे उल्लंघन केल्याबद्दल गुरुवारी पुणे विभागांतर्गत तीन हॉटेलचे परवाने तत्काळ निलंबित केले. मलकापूर (सातारा) येथील हॉटेल शाही, लोणावळ्यातील साबेर रेस्टॉरंट आणि पुण्यातील कोरेगाव पार्कमधील सैराट बिर्याणी या तीन हॉटेलचा समावेश आहे.
अन्न व औषध प्रशासनाच्या १० सप्टेंबर रोजीच्या पत्रकानुसार, संबंधित आस्थापनांमध्ये अन्न सुरक्षा आणि स्वच्छतेसंदर्भातील निर्धारित नियमांचे उल्लंघन आढळून आले. अन्न सुरक्षा व मानके कायद्यांतर्गत अन्न व्यवसायिकांना स्वच्छता, सुरक्षित अन्न हाताळणी आणि निर्धारित अटींचे पालन केले नसल्याचे पालन केले नसल्याचे तपासणीदरम्यान आढळून आले.
सणासुदीच्या काळात अन्नपदार्थांची मागणी वाढत असताना अन्न सुरक्षा नियमांचे काटेकोर पालन करण्याचे आवाहन प्रशासनाने केले आहे. नागरिकांच्या आरोग्याशी संबंधित बाबींमध्ये नियमभंग आढळल्यास कठोर कारवाई केली जाणार असल्याचा इशाराही अन्न औषध विभागाकडून देण्यात आला आहे.