Pune crime news husband killed wife
पुणे: पुण्यातून एक धक्कादायक बातमी समोर आली आहे. पतीने मध्यरात्री पत्नीचा गळा दाबून खून केल्याची घटना उघडकीस आली आहे. त्यानंतर हे कृत्य लपवण्यासाठी मृतदेह दुचाकीवरून घेऊन जाताना पती पोलिसांच्या जाळ्यात अडकला.
राकेश रामनायक निसार असे या आरोपी पतीचे नाव आहे. नांदेड सिटी परिसरात ही धक्कादायक घटना घडली आहे. ही घटना मंगळवारी रात्री दीड वाजण्याच्या सुमारास घडली असल्याची माहिती समोर येत आहे. (Latest Pune News)
पोलिसांनी दिलेल्या माहितीनुसार, भूमकर पुलाकडून राकेश पत्नीची बॉडी घेवून स्वामीनारायण मंदिराच्या दिशेने निघाला होता. यावेळी आंबेगाव आणि भारती विद्यापीठ पोलिसांच्या गस्ती पथकाला त्याच्यावर संशया आला त्यामुळे पोलिसांनी त्याला ताब्यात घेतले. तपासणीत पत्नीचा मृतदेह आढळून आला आणि खूनाचा प्रकार उघडकीस आला. राकेशने पत्नीचा गळा दाबून खून केल्याचे प्राथमिक तपासात समोर आले आहे.
राकेशने आपल्या पत्नीचा खून का केला याची माहिती अद्याप समोर आलेली नाही. नांदेड सिटी पोलिसांनी गुन्हा नोंदवून राकेश याला अटक केली आहे. मृतदेह शवविच्छेदनासाठी पाठवण्यात आला असून पोलिसांकडून या प्रकरणाचा अधिक तपास सुरू आहे. या घटनेमुळे परिसरात खळबळ उडाली आहे.