पुणे; पुढारी वृत्तसेवा : दोघांची दिल्लीत एका इव्हेंटच्या कार्यक्रमात ओळख झाली… तो मूळचा बिहारचा… तर ती उत्तराखंडची… दोघांना व्यायामाची आवड… तेथूनच त्यांनी अशा एका कामाची निवड केली की, तोंड दाबून बुक्क्यांचा मार खालला, तरी समोरच्या व्यक्तीला कोणाला काही सांगता येत नव्हते, न बोलता येत होते… त्याचाच फायदा घेत या दोघांनी पुण्यात अनेकांना आपल्या जाळ्यात अडकवून लुटले. त्यासाठी दोघे दिल्ली ते मुंबई असा विमानाने प्रवास करत होते. मात्र, सामाजिक सुरक्षा विभागाचे सहायक पोलिस निरीक्षक राजेश माळेगावे यांच्या पथकाच्या निदर्शनास हा प्रकार आला अन् दोघांचे बिंग फुटले.
डेटिंग अॅपद्वारे संपर्क साधून हनिट्रॅपद्वारे आंबटशौकिनांना लॉजवर बोलावून मारहाण करीत लुटणार्या बंटी-बबलीला गुन्हे शाखेच्या पथकाने तुर्भे, मुंबई येथून बेड्या ठोकल्या आहेत. नितीश नवीन सिंग (वय 28, रा. मूळ बिहार, सध्या दिल्ली), कविता उर्फ पूजा नवीनचंद्र भट (वय 28, रा. उत्तराखंड, दिल्ली) अशी दोघांची नावे आहेत. आतापर्यंत त्यांनी पुण्यातील तिघांना अशाप्रकारे लुटल्याचे समोर आले आहे. त्यामध्ये व्यावसायिक आणि सीएचा समावेश आहे. इतर राज्यातदेखील त्यांनी असे गुन्हे केल्याचे पोलिसांनी सांगितले.
मागील आठवड्यात सीकिंग अॅडव्हेंचर या डेटिंग अॅपद्वारे संपर्क करून एका व्यावसायिकाला दोघांनी लुटल्याची घटना खराडी परिसरात घडली होती. याप्रकरणी पूजा नावाच्या महिलेसह तिच्याबरोबर असलेल्या साथीदाराविरुद्ध चंदननगर पोलिस ठाण्यात गुन्हा दाखल केला होता. याबाबत एका व्यावसायिक तरुणाने फिर्याद दिली होती. दाखल गुन्ह्याचा समांतर तपास करीत असताना, तांत्रिक विश्लेषणाद्वारे हे दोघे आरोपी पुण्यातून मुंबईच्या दिशने निघाल्याचे समजले. त्यानंतर पथकाने दोघांना तुर्भे मुंबई येथील एका पंचतारांकित हॉटेलच्या परिसरातून ताब्यात घेतले. खात्री झाल्यानंतर त्यांना अटक करण्यात आली.
आरोपी कविता ऊर्फ पूजा ही डेटिंग अॅपद्वारे समोरच्या व्यक्तीसोबत संपर्क साधत होती. त्यानंतर फोटो पाठवून त्याला हॉटेलमध्ये खोली बुक करण्यास सांगत असे. भेटण्याचा दिवस ठरल्यानंतर ती तेथे जात होती. खोलीत तिने प्रवेश करताच, तिचा साथीदार नितीश हा तेथे येत होता. त्याने आत प्रवेश करताच दोघे समोरच्या व्यक्तीला बेदम चोप देत असत. त्यानंतर त्याला विविध प्रकारच्या धमक्या देऊन त्याच्याकडील रोकड, सोन्याचा ऐवज लंपास करीत होते.
या दोघांनी आंबटशौकिनांना आपल्या जाळ्यात अडकवून लुटले आहे. प्रश्न डेटिंग अॅप आणि लॉज हॉटेल त्यात मारहाणीचा असल्यामुळे तक्रारदार शांत बसत होते. वाच्यता करायची म्हटले, तर आपलीच अब्रू जाणार, या भीतीपोटी कोणी तक्रार करण्यास धजत नव्हते.
बंटी-बबलीने व्यावसायिक तरुणापासून सीए, अभियंत्यालाही सोडले नाही. खराडी येथे व्यावसायिक तरुणाला लुटल्यानंतर त्यांनी नर्हे येथील एका सीएला आपल्या जाळ्यात अडकवून लुटले. 38 हजार रुपयांची रोकड, सोन्याचे दागिने असा त्यांच्याकडील 90 हजार रुपयांचा ऐवज जबरदस्तीने हिकावून पळ काढला.
याप्रकरणी 36 वर्षीय सीएने दिलेल्या फिर्यादनुसार सिंहगड रोड पोलिसांनी गुन्हा दाखल केला आहे. तर, तिसरा प्रकार विमाननगर परिसरात घडला असून, एका अभियंत्याच्या घरी जाऊन या दोघांनी तब्बल चार लाख रुपये ऑनलाईन ट्रान्सफर करून घेत त्याला मारहाण केली आहे. या 31 वर्षीय तरुणाचा परिचय कविता ऊर्फ पूजा भट हिच्यासोबत डेटिंग अॅपद्वारे झाला. पुढे टेलिग्रामद्वारे तिने तरुणाला संपर्क करून हॉटेलवर बोलावले. बलात्काराचा गुन्हा दाखल करण्याची धमकी देत मोबाईलमधून ऑनलाईन चार लाख रुपये काढून घेतले.
समांतर तपास करत असताना, पोलिसांनी युपीआयद्वारे ऑनलाईन झालेल्या ट्रान्झेक्शनद्वारे बंटी -बबलीचा मोबाईल क्रमांक शोधून काढला. त्यानंतर दोघांचा पत्ता शोधला. त्या वेळी ते पुण्यातून मुंबईच्या दिशेने रवाना झाल्याचे समजले. मात्र, ते नेमके कोठे आहेत, हे समजत नव्हते. तांत्रिक विश्लेषणाद्वारे पोलिस कर्मचारी तुषार भिवरकर, सागर केकान यांनी ते दोघे तुर्भे, मुंबई येथे असल्याचे शोधून काढले. त्यानंतर गुन्हे शाखेच्या पथकाने स्थानिक पोलिसांची मदत घेत एका पंचतारांकित हॉटेल परिसरातून त्यांना ताब्यात घेतले.
त्यांच्याकडे केलेल्या चौकशीत सुरुवातीला दोघांनी उडवाउडवीची उत्तरे दिली. मात्र, पोलिसी खाक्या दाखवताच दोघांनी गुन्ह्याची कबुली दिली. ही कामगिरी अपर पोलिस आयुक्त रामनाथ पोकळे, उपायुक्त अमोल झेंडे, वरिष्ठ पोलिस निरीक्षक भरत जाधव यांच्या मार्गदर्श?ाखाली सहायक पोलिस निरीक्षक राजेश माळेगावे, अश्विनी पाटील, अनिकेत पोटे, कर्मचारी राजेंद्र कुमावत, सागर केकान, तुषार भिवरकर, अमेय राणा, इम—ान नदाफ, मनीषा पुकाळे यांच्या पथकाने केली.
दोघा आरोपींनी डेटींग अॅपद्वारे संपर्क करून नागरिकांना लुटले आहे. आत्तापर्यंत असे तीन प्रकार समोर आले असून, याबाबत गुन्हे दाखल करण्यात आले आहेत. जर असा प्रकार कोणासोबत घडला असेल तर त्यांनी गुन्हे शाखेला संपर्क करावा.
– भरत जाधव, वरिष्ठ पोलिस निरीक्षक सामाजिक सुरक्षा
हेही वाचा