पुणेः घरात हुक्का पार्लर थाटून, फोनद्वारे ऑर्डर घेऊन सर्व्हिस देणाऱ्या तिघांना विमानतळ पोलिसांनी पकडले. त्यांच्याकडून 34 हुक्का पॉट, शेगडी, फिल्टर पाईप, चिलीम, हुक्का फ्लेवर्स असे एक लाख रुपयांचे साहित्य जप्त केले आहे.पोलिसांच्या कारवाईच्या धाकाने तिघांनी घरातूनच हुक्का पार्लर सुरू करण्याची नामी शक्कल लढविल्याचे पोलिसांच्या तपासात समोर आले आहे.
अश्रफ निजाम्मुदीन अन्सारी (वय.25), असलान फिरोज अन्सारी (वय.24),गुलजार निजामुद्दीन अन्सारी (वय.25,राहणार तिघे सद्या म्हाडा कॉलनी विमाननगर, मुळ. उत्तरप्रदेश) अशी ताब्यात घेण्यात आलेल्यांची नावे आहेत. याप्रकरणी, पोलिस कर्मचारी हरीप्रसाद नवनाथ पुंडे यांनी विमानतळ पोलिस ठाण्यात फिर्याद दिली आहे. त्यानुसार पोलिसांनी या तिघांच्या विरुद्ध तंबाखुजन्य उत्पादने अधिनियमानुसार गुन्हा दाखल करण्यात आला आहे.
पोलिसांनी दिलेल्या माहितीनुसार, विमानतळ पोलिसांचे पथक गस्तीवर होते. त्यावेळी पोलिस उपनिरीक्षक नितीन राठोड यांना बातमीदारामार्फत माहिती मिळाली की, लेन क्रमांक पाच, म्हाडा कॉलनी येथे तिघेजण अवैधपने हुक्का विक्री करत आहेत. त्यानुसार बुधवारी (दि.26) सायंकाळी सव्वा सात वाजताच्या सुमारास पथकाने म्हाडा कॉलनीतील एका सदनिकेत छापा टाकला.
यावेळी तिघा आरोपींनी विविध प्रकारचे हुक्का फ्लेवर्स, तसेच हुक्का ओढण्याच्या साहित्याचा साठा केल्याचे दिसून आले. पोलिसांनी हे सर्व साहित्य जप्त केले आहे. चौकशी हे तिघे ग्राहकांना ऑर्डर मिळले त्या प्रमाणे बाहेर जाऊन हुक्का सर्व्हिस देत असल्याचे समोर आले आहे. ही कामगिरी पोलिस उपायुक्त सोमय मुंडे, वरिष्ठ पोलिस निरीक्षक गोविंद जाधव, गुन्हे निरीक्षक शरद शेळके यांच्या मार्गदर्शनाखाली पोलिस उपनिरीक्षक नितीन राठोड यांच्या पथकाने केली आहे