Extortion demand Pune
खेड : कॅन्टीन चालु करण्याच्या हेतूने चार जणांनी कंपनीत कॅन्टीन चालवणाऱ्या व्यक्तीला धमकावले तसेच कॅन्टीन चालवायचे असल्यास दर महिन्याला २५ हजार रुपयांची खंडणीची रक्कम द्यावी अन्यथा जीवे मारीन अशी धमकी देण्यात आली. खेड तालुक्यातील कन्हेरसर येथील खेड सिटी परिसरात यांगसन कंपनीच्या गेटजवळ मंगळवारी (दि १३) सकाळी पावणे बाराच्या सुमारास हा खंडणीचा गंभीर प्रकार घडला.
बेकायदा जमाव जमवुन खंडणी मागणाऱ्या राहुल शंकर मकाळे, कमलेश मुकुंद दौंडकर, सुरज दगडु हजारे आणि मनोज शंकर मकाळे (सर्व रा. कन्हेरसर, ता. खेड) यांच्या विरोधात खेड पोलिसांनी गुन्हा दाखल केला आहे.
याबाबत कॅन्टीन चालक रोशन छबुराव काळे (वय ३८, रा. सेक्टर २८, गंगानगर, निगडी, पुणे) यांनी तक्रार दिली आहे. दिलेल्या तक्रारीनुसार, चार जणांनी त्यांना जीवे मारण्याची धमकी देत २५ हजार रुपये खंडणीची मागणी केली.रोशन काळे यांचा इंडस्ट्रियल कँटिनचा व्यवसाय आहे.
मंगळवारी सकाळी त्यांचा टेम्पो चालक अनिल वाळुंज यांगसन कंपनीत जेवण घेऊन जात असताना आरोपी राहुल मकाळे, कमलेश दौंडकर, सुरज हजारे आणि मनोज मकाळे यांनी गेटच्या बाहेर टेम्पो अडवला. त्यांनी चालकाला जेवण घेऊन जाण्यास मज्जाव केला. यानंतर रोशन काळे आणि त्यांची पत्नी घटनास्थळी गेले असता, आरोपींनी त्यांना शिवीगाळ करत धमकी दिली. "कॅन्टीनची ऑर्डर रद्द करा, पुन्हा कंपनीत जेवण घेऊन येऊ नका, नाहीतर तुम्हाला मारून टाकू," असे म्हणत त्यांनी दहशत निर्माण केली. तसेच, व्यवसाय चालू ठेवायचा असेल तर दरमहा २५ हजार रुपये खंडणी द्यावी लागेल, अशी मागणी केली.
या प्रकरणी रोशन काळे यांनी खेड पोलिस ठाण्यात तक्रार दाखल केली आहे. पोलीस उपनिरीक्षक श्रीकांत गोडगे तपास करत आहेत. पोलिसांनी आरोपींविरुद्ध खंडणी, धमकी आणि दहशत निर्माण केल्याप्रकरणी गुन्हा दाखल केला आहे.