सासवड: पिलाणवाडी धरणाची एकूण साठवण क्षमता 67.45 दशलक्ष घनफूट आहे. सध्या धरण ओव्हरफ्लो झाले असून सांडव्यावरून पाणी वाहत असल्याची माहिती पाटबंधारेचे गराडे शाखा अधिकारी अविनाश जगताप यांनी दिली.
पिलाणवाडी तलावातून शिवरी परिसरातील खळद, एखतपूर-मुंजवडी, वाळुंज, निळुंज, बेलसर, तक्रारवाडी, साकुर्डे या गावांसाठी शिवरी प्रादेशिक नळ पाणीपुरवठा योजना चालू आहे. धरणातून 400 केव्ही विद्युत वितरण कंपनी जेजुरीस पाणीपुरवठा केला जातो. धरण भरल्याने पिलाणवाडी, खेंगरेवडी, हरगुडे, यादववाडी, सटलवाडी, परिंचे, पांगारे आदी गावांचा शेती व पिण्याचा पाण्याचा प्रश्न मिटला आहे. या धरणावर परिसरातील 399 हेक्टर इतके क्षेत्र सिंचित होते. (Latest Pune News)
मे, जून व जुलै महिन्यात धरण परिसरात जोरदार पाऊस झाल्याने धरण 100 टक्के भरल्याचे सासवड पाटबंधारे शाखेचे संदेशक एस. एच. कोरपडे यांनी सांगितले. पुरंदर तालुक्यातील पावसाची आतापर्यंतची आकडेवारी पुढीलप्रमाणे - सासवड 245 मि.मी., जेजुरी 297 मि.मी., भिवडी 240 मि.मी., परिंचे 190 मि.मी., राजेवाडी 270 मि.मी., वाल्हा 300 मि.मी., कुंभारवळण 205 मि.मी., शिवरी 140 मि.मी. पुरंदर तहसीलमधील लिपिक सोमनाथ आव्हाळे यांनी ही माहिती दिली.