पुणे: महाराष्ट्र लोकसेवा आयोग अर्थात एमपीएससीच्या परीक्षांसाठी कमाल वयोमर्यादेत एक वर्षाची शिथिलता देण्यात आली आहे. त्यामुळे महाराष्ट्र गट-ब (अराजपत्रित) सेवा संयुक्त पूर्व परीक्षा आणि महाराष्ट्र गट-क सेवा संयुक्त पूर्व परीक्षेसाठी वयोमर्यादा झालेल्या पात्र उमेदवारांना अर्ज भरण्याची संधी मिळणार असून, त्यांना 6 जानेवारीपर्यंत अर्ज भरता येणार आहे. ज्या स्पर्धा परीक्षार्थींची वयोमर्यादा संपुष्टात आली होती, अशा सर्व उमेदवारांना मोठा दिलासा मिळाला आहे.
एक वेळची विशेष बाब म्हणून वयोमर्यादा ओलांडलेल्या उमेदवारांना संधी देण्याचा निर्णय आयोगाकडून घेण्यात आला आहे. या निर्णयाच्या अनुषंगाने एमपीएससीने प्रसिद्ध केलेल्या महाराष्ट्र गट-ब (अराजपत्रित) सेवा संयुक्त पूर्व परीक्षा 2024 आणि महाराष्ट्र गट-क सेवा संयुक्त पूर्व परीक्षा 2024 या निश्चित केलेल्या कमाल संवर्गाच्या जाहिरातींस अनुसरून वयोमर्यादेमध्ये एक वर्षाची शिथिलता देण्यात आली आहे.
राज्यात मागास वर्गासाठी राज्य शासकीय सेवेतील पदांवर नियुक्तीसाठी आरक्षणाची तरतूद करण्यात आली आहे. या अधिसूचनेतील तरतुदीच्या अंमलबजावणीसाठी शासनामार्फत पदसंखेच्या अनुषंगाने आरक्षण नमूद करून सुधारित मागणीपत्रे एमपीएससीला देण्यात आली होती. त्यानुसार एमपीएससीने जाहिराती प्रसिद्ध केल्या होत्या.
उमेदवारांना 26 डिसेंबर ते 6 जानेवारी या कालावधीत अर्ज करता येणार आहे. ऑनलाइन परीक्षा शुल्क भरण्यासाठी 6 जानेवारी ही अंतिम मुदत आहे.
दोन्ही परीक्षांसाठी नव्याने अर्ज सादर करणाऱ्या उमेदवारांना केवळ अमरावती, छत्रपती संभाजीनगर, नागपूर, नाशिक, नवी मुंबई आणि पुणे या जिल्हा केंद्रांवरील परीक्षा उपकेंद्रांवर प्रवेश देण्यात येईल असे देखील स्पष्ट करण्यात आले आहे.