पुणे: कोथरूडमधील आयटी कर्मचाऱ्याला मारहाण केल्याप्रकरणी महाराष्ट्र संघटित गुन्हेगारी नियंत्रण कायद्यानुसार (मकोका) दाखल गुन्ह्यातील मारणे टोळीतील दोन आरोपींचा जामीन अर्ज विशेष न्यायालयाने फेटाळला. रूपेश कृष्णराव मारणे (रा. नवएकता कॉलनी, कोथरूड) आणि किरण कोंडिबा पडवळ (वय 31, रा. शास्त्रीनगर, कोथरूड) अशी जामीन फेटाळलेल्यांची नावे आहेत. विशेष न्यायाधीश एस. एस. कंठाळे यांनी हा जामीन अर्ज फेटाळला आहे.
गुन्ह्यात जामीन मिळण्यासाठी मारणे आणि पडवळ याने विशेष न्यायालयात अर्ज केला होता. त्यास, सरकार पक्षाच्या वतीने विशेष सरकारी वकील प्रमोद बोंबटकर यांनी विरोध केला. याप्रकरणात दोषारोपपत्र दाखल केले आहे. आरोपींनी केलेला गुन्हा गंभीर स्वरूपाचा असून, टोळीचे वर्चस्व कायम राहावे म्हणून तो करण्यात आला आहे. गजा मारणेला जामीन देताना मागील कोर्टाने काही गंभीर बाबी विचारात घेतल्या नाहीत.
पहिल्या गुन्ह्यात जामिनावर असताना आरोपींनी हा गुन्हा केला आहे. मकोका कायदा कलम 21(5) चा नुसार आधीच्या गुन्ह्यात जामिनावर असताना गुन्हा केला असल्यास जामीन देण्यास कायद्याने प्रतिबंध आहे. रूपेशविरोधात 18 गुन्हे असून, त्यापैकी 5 गुन्हे मकोकासंबंधित आहेत. किरणविरोधात तीन गुन्हे दाखल असून, त्यामध्ये एका गुन्ह्यात मकोकाअंतर्गत कारवाई करण्यात आली आहे.
गोपनीय साक्षीदारांनी दिलेल्या जबाबातून आरोपींचा सहभाग निष्पन्न होत आहे. फरार आरोपींचा शोध घेण्यात येत असून, त्यांना जामीन मंजूर झाल्यास ते त्यांना मदत करण्याची शक्यता आहे. आरोपींविरोधात खून, खुनाचा प्रयत्न, जबरी चोरी, फसवणूक यांसारखे गंभीर गुन्हे दाखल आहेत. तांत्रिक विश्लेषणावरून ते घटनास्थळी हजर होते हे दिसून येत आहे. या घटनेचे सीसीटीव्ही फुटेज पोलिसांकडे आहे, असा युक्तिवाद ॲड. बोंबटकर यांनी केला. तो ग््रााह्य धरत न्यायालयाने दोघांचा जामीन फेटाळला.
काय आहे प्रकरण?
कोथरूडमधील भेलकेनगर येथे मारणे टोळीतील सराईतांनी देवेंद्र जोग नावाच्या तरुणाला बेदम मारहाण केल्याची घटना 19 फेबुवारी रोजी सायंकाळी साडेचार वाजता घडली होती. त्याची गंभीर दखल घेत पुणे पोलिसांनी गजानन मारणे याच्यासह रूपेश मारणे, ओम तीर्थराम धर्मजिज्ञासू, किरण कोंडिबा पडवळ, अमोल विनायक तापकीर (सर्व रा. शास्त्रीनगर, कोथरूड) आणि बाब्या उर्फ श्रीकांत संभाजी पवार (रा. वडगाव रासाई, शिरूर) या सहा जणांवर मकोका कारवाई केली.