सुरक्षित आयटी नोकरी सोडून यूट्यूबमध्ये प्रवेश; २४ चॅनेल अपयशी झाले आणि ३ लाखांची गुंतवणूक वाया गेली.
साध्या 'मोमो' व्हिडिओमुळे नशीब पालटले; कुटुंबाचा सक्रिय सहभागही यशात मोलाचा.
एका वर्षात १०० कोटी व्ह्यूज आणि १ मिलियन सबस्क्रायबर्सचा टप्पा पार; मराठी प्रेक्षकांचे भरभरून प्रेम मिळाले.
"आयटीतला एसीमधला जॉब सोडून रस्त्यावर येणार का?"... एकेकाळी हे टोमणे ऐकणाऱ्या मनोज शिंगुस्ते या तरुणाच्या 'स्पाईसकिक' (SpicyKick) या यूट्यूब चॅनेलने आज तब्बल १० लाख (१ मिलियन) सबस्क्रायबर्सचा ऐतिहासिक टप्पा पार केला आहे. एकदा नाही, दोनदा नाही तर तब्बल २४ वेळा अपयशी ठरल्यानंतर, बँक खातं शून्य झाल्यानंतर आणि नशिबानेही साथ सोडली असं वाटत असताना, एका साध्या 'मोमो'च्या व्हिडिओने त्याचं आयुष्य बदलून टाकलं. ही केवळ एका यूट्यूबरच्या यशाची कहाणी नाही, तर ती आहे प्रचंड जिद्द, कुटुंबाचा भक्कम पाठिंबा आणि मराठी प्रेक्षकांच्या प्रेमातून घडलेल्या एका अविश्वसनीय प्रवासाची गोष्ट.
मनोज शिंगुस्ते, एक सामान्य आयटी कर्मचारी. गाडी, एसी ऑफिस आणि शनिवार-रविवारची सुट्टी असं आरामदायी आयुष्य सोडून त्याने यूट्यूबवर व्हिडिओ बनवण्याचं स्वप्न पाहिलं. पण हा निर्णय त्याच्या आईशिवाय कुणालाच पटला नाही. अनेकांनी त्याला वेड्यात काढलं. दुर्दैवाने, सुरुवातीला ते खरंही ठरलं. त्याचे पहिले तीन यूट्यूब चॅनेल सपशेल फ्लॉप झाले. नोकरी सोडल्यावर सुरू केलेला चौथा चॅनेलही चालला नाही. २२ व्हिडिओ टाकूनही व्ह्यूजचा आकडा ५० च्या वर जाईना. डोक्यावर खर्चाचा डोंगर आणि हातात काहीच नाही, अशी परिस्थिती निर्माण झाली होती.
पोटापाण्यासाठी मनोजने काही मोठ्या लोकांची फेसबुक पेजेस सांभाळायला सुरुवात केली. महिना ३ हजार रुपयांवर १० पेजेस सांभाळण्याचं काम मिळालं. पण इथेही नशिबाने दगा दिला. पहिल्या महिन्याचे पैसे मिळाले, पण पुढच्या महिन्यापासून पैसे मागायलाही लाज वाटू लागली. "फॉर्च्युनरमधून फिरणाऱ्या क्लायंटला ३ हजारांसाठी चार वेळा फोन कसा करायचा?" या विचाराने तो खचून गेला.
याच काळात त्याला एक नवी कल्पना सुचली. मंत्रांच्या व्हिडिओला करोडो व्ह्यूज मिळतात हे पाहून त्याने एका म्युझिक प्रोड्यूसरसोबत मिळून ३७ मंत्रांचे व्हिडिओ बनवले. यासाठी त्याने तब्बल ३ लाख रुपये गुंतवले आणि त्याचं बँक खातं पूर्णपणे रिकामं झालं. पण हा प्रयत्नही फसला. तीन महिन्यांत केवळ एका मंत्राला ८०० व्ह्यूज मिळाले आणि बाकी सर्व १०० च्या आतच राहिले.
सर्व काही संपलं असं वाटत असतानाच कोविड आला आणि परिस्थिती आणखी बिघडली. पण याच काळात त्याने पुन्हा डिजिटल मार्केटिंग एजन्सी सुरू केली. दोन पार्टनर सोबत घेऊन मोठं ऑफिस थाटलं. राजकीय पक्षांसाठी काम सुरू केलं, पण २०१९ नंतर निवडणुकाच न झाल्याने हा व्यवसायही ठप्प झाला. या काळातही त्याने आणखी ३-४ यूट्यूब चॅनेल सुरू करून पाहिले, पण अपयश पाठ सोडेना. एकूण २४ चॅनेल फ्लॉप झाले होते.
याचदरम्यान त्याचं लग्न झालं आणि एके दिवशी तो सहजच बायको आणि मुलासोबत मोमो खायला गेला. तिथे त्याने गंमत म्हणून एक व्हिडिओ बनवला आणि तोच त्याच्या आयुष्याचा 'टर्निंग पॉईंट' ठरला. तो पहिलाच व्हिडिओ प्रचंड व्हायरल झाला. त्यानंतर दुसरा, तिसरा... आणि पाहता पाहता 'स्पाईसकिक' या चॅनेलने गगनभरारी घेतली.
मनोजच्या या प्रवासात त्याची पत्नी आणि मुलगा 'बारक्या' हे त्याचे सर्वात मोठे आधारस्तंभ ठरले. "बायकोने ८ व्या महिन्यापर्यंत प्रेग्नंट असतानाही काम केलं. पहिला व्हिडिओ केला तेव्हा बारक्या फक्त साडेतीन वर्षांचा होता आणि त्याचा पहिला डायलॉगही बोबडा होता. त्या दोघांनी ज्याप्रकारे मला साथ दिली, ते पाहून मी फक्त भारावून गेलो," असं मनोज सांगतो.
आज जुलै २०२३ ते आतापर्यंत, केवळ एका वर्षाच्या काळात त्याने ३००-३५० व्हिडिओ टाकले असून, त्याला जवळपास १०० कोटी व्ह्यूज मिळाले आहेत. बॉलिवूड स्टार्स, टॉप ब्रँड्स, मराठी अभिनेते आणि प्रसिद्ध न्यूज चॅनेलमध्ये मुलाखतींपर्यंत त्याने मजल मारली आहे.
मनोज म्हणतो, "आज हा १ मिलियनचा आकडा केवळ माझा, बारक्याचा किंवा कॅमेरामनचा नाही. यात माझे मित्र, कुटुंब आणि माझ्यावर प्रेम करणाऱ्या तमाम मराठी प्रेक्षकांचा सिंहाचा वाटा आहे. मी सगळ्यांचे मनापासून आभार मानतो. ही तर फक्त सुरुवात आहे!"