पुणे: गणेशोत्सवाच्या काळात मध्यवस्तीतील वाढती गर्दी लक्षात घेता मंडई मेट्रो स्थानक पूर्णपणे बंद करण्यात आल्याची अफवा पसरली होती. मात्र, ही माहिती चुकीची असून भाविकांच्या सोयीसाठी आणि सुरक्षेसाठी महामेट्रोने मंडई स्थानकात ''एकेरी'' प्रवासाची नवी नियमावली लागू केली आहे.
नवीन नियोजनानुसार, मंडई मेट्रो स्थानकाचे गेट नंबर ३ (लोकमान्य टिळक पुतळ्याजवळ) हे फक्त स्थानकात प्रवेश करण्यासाठी खुले ठेवण्यात आले आहे. तर, छत्रपती शिवाजी महाराज रस्त्यावरील गेट नंबर २ चा वापर प्रवाशांना स्थानकातून बाहेर पडण्यासाठी करावा लागणार आहे. या बदलामुळे स्थानकातील गर्दीची कोंडी फुटण्यास मदत होणार आहे.
मेट्रो अधिकाऱ्यांनी दिलेल्या माहितीनुसार, गर्दीचे व्यवस्थापन सुरळीत ठेवण्यासाठी सध्यातरी या नियोजनात कोणताही बदल केला जाणार नाही. गणेशोत्सवासाठी मध्यवस्तीत येणाऱ्या भाविकांनी परतीच्या प्रवासासाठी मुख्यत्वे मंडई स्थानकाचा वापर करावा, असे आवाहनही मेट्रो प्रशासनाकडून करण्यात आले आहे.
वाहतूक कोंडी टाळण्यासाठी नागरिकांचे मेट्रोला प्राधान्य
शनिवार-रविवारच्या सुट्यांमुळे मध्यवस्तीत गणेश दर्शनासाठी भाविकांचा महापूर आला आहे. वाहतूक कोंडी टाळण्यासाठी नागरिक मेट्रो प्रवासाला प्राधान्य देत आहेत. स्थानकावर चेंगराचेंगरी किंवा अनुचित प्रकार घडू नये, यासाठी हे प्रवासाचे वर्गीकरण करण्यात आले आहे.
या नव्या एकेरी व्यवस्थेमुळे भाविकांना गोंधळ न होता अधिक सुरक्षित आणि सोयीस्कररीत्या मेट्रोचा प्रवास करता येत आहे. तसेच, मंडई मेट्रो स्थानकावरील गर्दी नियंत्रणासाठी प्रवाशांनी मेट्रोला सहकार्य करण्यासाठी डेक्कन आणि पुणे महापालिकेच्या मेट्रो स्थानकावर उतरून पायी चालत मध्यवस्तीत प्रवेश करावा, असे आवाहन देखील मेट्रो प्रशासनाने केले आहे.