कुरकुंभ: कुरकुंभ (ता. दौंड) औद्योगिक क्षेत्रातील एका कारखान्याच्या संचालकाला धमकी देऊन खंडणी मागितल्याप्रकरणी एकावर दौंड पोलिस ठाण्यात गुन्हा दाखल करण्यात आला. शरद शितोळे (रा. पांढरेवाडी कुरकुंभ, ता. दौंड) असे गुन्हा दाखल असलेल्याचे नाव आहे. याबाबत दीपक मोरारजी ठक्कर (वय ५७, रा. फ्लॅट नंबर २८, एच ५ शिवशक्ती सोसायटी, मॉडेल टाउन शेजारी, मुलुंड पश्चिम मुंबई) यांनी फिर्याद दिली.
कारखान्याचे संचालक कल्पेश ठक्कर यांना मोबाईल फोनवर व्हाट्सॲप काॅल आला होता. समोरच्या व्यक्तीने शरद शितोळे बोलतो असे सांगितले. 'कारखान्यात तयार झालेला माल मला पाहिजे. प्रक्रिया केलेला सालव्हंट (माल) किती रुपयांत विक्री करता मला काही माहिती नाही.
मी सांगेल त्याच किंमतीत माल द्यावा लागेल. मोकळे ड्रम माझ्याकडून व मी सांगेल त्याच किंमतीत घ्यावे लागेल. तसे न केल्यास मी स्थानिक असल्याने कारखान्याची महाराष्ट्र प्रदूषण नियंत्रण व औद्योगिक सुरक्षा व आरोग्य विभागाकडे तक्रार करून कारखाना बंद करेल', असे सांगत हातपाय तोडण्याची धमकी दिली.
कारखान्याशी पत्रव्यवहार किंवा ई-मेल व कोणत्याही प्रकाराचा व्यवहार न करता धमकावून जबरदस्तीने प्रक्रिया केलेला सालव्हंट मालाची मागणी केल्याची तक्रार कल्पेश ठक्कर यांनी दाखल केली.