जेजुरी : महाराष्ट्राचे कुलदैवत असणाऱ्या जेजुरी गडावरील खंडोबा मंदिरात शाकंभरी उत्सवानिमित्त फळभाज्या व पालेभाज्यांची आरास करण्यात आली. पौष महिन्याच्या शुक्ल पक्षातील अष्टमीपासून पौष पौर्णिमेपर्यंत शाकंभरी उत्सव साजरा केला जातो. शनिवारी (दि. 3) पहाटेच्या पुजेवेळी पुजारी सेवक वर्गाच्या वतीने ही सजावट करण्यात आली.
पौराणिक कथेनुसार जेव्हा पृथ्वीवर प्रलय आला होता, सर्वत्र अन्नधान्याची टंचाई होती तेव्हा त्रैलोकातील दुःख पाहून ऋषींनी मातेची प्रार्थना केली. मग शाकांबरी देवीने भाजी आणि वृक्षवेलींच्या रूपाने विश्वाचे पालनपोषण केले आणि विश्वाचा नाश होण्यापासून वाचवले. त्यामुळे शाकंभरी उत्सव काळात हिरव्या पालेभाज्या, फळभाज्या आणि शेंगवर्गीय भाज्यांची पूजा केली जाते आणि त्याचा प्रसाद भाविकांमध्ये वाटला जातो.
या उत्सवासाठी 300 किलो पालेभाज्या, फळभाज्या व शेंगवर्गीय भाज्या वापरण्यात आल्या. ही आरास नित्य वारकरी, पुजारी वर्ग, कर्मचारी सेवेकरी वर्ग यांनी केली.
महाराष्ट्राचे कुलदैवत असणाऱ्या जेजुरीच्या खंडोबा मंदिरात शाकंभरी उत्सवानिमित्त करण्यात आलेली फळ व पालेभाज्यांची आरास. (छायाचित्र : महेश शिंदे)