ISRO Scientist Death
पुणेः इस्रोतील माजी वरिष्ठ शास्त्रज्ञ विजय पेंडसे (वय 80 वर्षे) यांचे दीर्घ आजाराने 30 जून रोजी अमेरिकेतील सॅन होजे येथे निधन झाले. त्यांच्या मागे पत्नी, मुलगा, मुलगी आणि नातवंडे असा परिवार आहे. ते सावित्रीबाई फुले पुणे विद्यापीठाचे विद्यार्थी होते.
त्यांनी रसायनशास्त्राचे पदव्युत्तर शिक्षण पुण्यात पूर्ण केले. पाषाण येथील एआरडीई येथे कनिष्ठ शास्त्रज्ञ म्हणून काम करीत असताना माजी राष्ट्रपती डॉ.अब्दुल कलाम यांनी त्यांची निवड थुंबा विषुवृत्तीय अग्निबाण प्रक्षेपण केंद्रावर साहाय्यक शास्त्रज्ञ म्हणून केली. तेथे त्यांना डॉ. वसंत गोवारीकर यांच्या सोबत काम करण्याची संधी मिळाली.
पेंडसे यांच्यावर अग्निबाणाच्या घन इंधन निर्मितीची जबाबदारी सोपविण्यात आली. हा विभाग स्वतंत्र काम करू लागला तेव्हां पेंडसे त्याचे प्रमुख बनले. भारताच्या एसएलव्ही- 3 आणि पीएसएलव्ही प्रक्षेपणात घन इंधनाचा वापर केला गेला. त्यानंतर 1995 मध्ये स्वेच्छानिवृत्ती घेऊन ते इस्रोतून बाहेर पडले. नंतर ते अमेरिकेत मिशिगन येथे एका रासायनिक कंपनीत रसायन विभाग प्रमुख म्हणून कार्यरत होते.