पुणे: कोलकाता येथील सत्यजित रे फिल्म अँड टेलिव्हिजन इन्स्टिट्यूट (एसआरएफटीआय) मधील विद्यार्थ्यांच्या आंदोलनाला पाठिंबा देण्यासाठी पुण्यातील फिल्म अँड टेलिव्हिजन इन्स्टिट्यूट ऑफ इंडियाच्या (एफटीआयआय) विद्यार्थ्यांनी मंगळवारी (दि. २७) देशव्यापी आंदोलनात सहभाग घेतला.
राष्ट्रीय स्वयंसेवक संघाशी संबंधित संघटनांकडून शैक्षणिक संस्थांमध्ये हस्तक्षेप आणि संस्थांच्या 'भगवेकरणा'चा प्रयत्न होत असल्याचा आरोप करीत एसआरएफटीआयच्या विद्यार्थ्यांनी आंदोलन पुकारले आहे. त्यांना पाठिंबा देण्यासाठी सकाळी १०.३० वाजता आंदोलन करण्यात आल्याचे एफटीआयआयच्या विद्यार्थी संघटनेने सांगितले. एसआरएफटीआय मधील सहा विद्यार्थ्यांचे निलंबन मागे घेण्याची मागणीही संघटनेने केली.
एसआरएफटीआयमधील विद्यार्थ्यांवर दि. २७ सप्टेंबर रोजी हिंसाचार झाल्याचा आरोप एफटीआयआयच्या विद्यार्थी संघटनेने केला आहे. त्यांच्या म्हणण्यानुसार, विद्यार्थ्यांची संमती नसताना परिसरात आयोजित करण्यात आलेला कार्यक्रम थांबविण्यास सांगितल्यानंतर अखिल भारतीय विद्यार्थी परिषदेशी (एबीव्हीपी) आणि अखिल भारतीय ग्राहक पंचायत (एबीजीपी) संबंधित सदस्यांनी विद्यार्थ्यांवर हल्ला केला.
या घटनेच्या निषेधार्थ एसआरएफटीआयच्या विद्यार्थ्यांनी सुरू केलेल्या लढ्याला एफटीआयआयच्या विद्यार्थ्यांनी पाठिंबा दिला आहे. एसआरएफटीआय प्रशासनाने सहा विद्यार्थ्यांना बजावलेल्या निलंबनाच्या नोटिसा मागे घ्याव्यात तसेच विद्यार्थ्यांना वसतिगृह आणि संस्थेच्या परिसरातून बाहेर काढण्याचे प्रयत्न थांबवावेत, अशा मागण्या आंदोलनाच्या केंद्रस्थानी आहेत.