पुणे: संरक्षण संशोधन आणि विकास संघटनेच्या (डीआरडीओ) अंतर्गत असलेल्या डिफेन्स इन्स्टिट्यूट ऑफ अॅडव्हान्स्ड टेक्नॉलॉजी (डाएट) मध्ये देशातील पहिल्या 30 सायबर कमांडोची तुकडी तयार झाली आहे. तसेच, या ठिकाणी सेमीकंडक्टर आणि डिफेन्स स्पेस टेक्नॉलॉजीमध्ये एम.टेक अभ्यासक्रम सुरू केले आहेत.
डाएट संस्थेच्या पदवीप्रदान सोहळ्याच्या निमित्ताने कुलगुरू डॉ. नारायण मूर्ती यांनी ही माहिती दिली. ते म्हणाले, संरक्षण क्षेत्राच्या तांत्रिक मागण्या पूर्ण करण्यासाठी, भारतीय सशस्त्र दलांच्या भविष्यातील गरजा, आगामी डीआरडीओ प्रकल्प आणि खासगी उद्योगांच्या मागण्या पूर्ण करण्यासाठी डिझाइन केले आहेत. युद्धाचे भविष्य तंत्रज्ञानावर आधारित आहे आणि या उत्क्रांतीत आम्ही महत्त्वाची भूमिका बजावतो. (Latest Pune News)
डाएटमध्ये 9 ऑगस्ट रोजी 18 वा दीक्षांत समारंभ होणार आहे. या वेळी संस्थेचे अध्यक्ष समीर कामत या समारंभाचे प्रमुख पाहुणे असतील आणि त्या दिवशी दोन नवीन प्रयोगशाळांचे उद्घाटन करतील. प्रत्येक दोन वर्षांच्या कार्यक्रमात 20 उमेदवारांना सामावून घेतले जाईल.
डाएट विकसित करणार ड्रोनचे तंत्रज्ञान...
डीआरडीओच्या शास्त्रज्ज्ञांच्या सहकार्याने डीआयएटीच्या प्राध्यापकांची एक टीम ड्रोन तंत्रज्ञानासाठी एक मशीन लर्निंग मॉड्यूल देखील विकसित करत आहे. सिंदूरसारख्या ऑपरेशन्सदरम्यान आणि रशिया आणि युक्रेन, इस्रायल आणि हमास यांच्यातील सुरू असलेल्या संघर्षांमध्ये आम्ही विविध प्रकारच्या ड्रोनचा व्यापक वापर पाहिला आहे. आमचे प्राध्यापक ड्रोन कार्यक्षमतेसाठी अविभाज्य असलेल्या प्रगत प्रणालींवर लक्ष केंद्रित करत आहेत, असेही मूर्ती यांनी सांगितले.
दोन तुकड्या लवकरच सुरू होतील
डीआयएटीच्या संगणक विज्ञान आणि अभियांत्रिकी विभागाच्या प्रमुख मनीषा नेने यांनी सांगितले की, गृह मंत्रालयाने निवडलेल्या कायदा अंमलबजावणी संस्थांमधील 30 कर्मचार्यांच्या पहिल्या तुकडीने अलीकडेच डीआयएटीमध्ये सहा महिन्यांचा सायबर कमांडो अभ्यासक्रम पूर्ण केला. या अभ्यासक्रमाच्या पुढील दोन तुकड्या लवकरच सुरू होतील. हा प्रशिक्षण कार्यक्रम देशभरात सायबर संरक्षण क्षमता वाढवण्यासाठी गृह मंत्रालयाच्या पुढाकाराचा एक भाग आहे. देशभरातील इतर नऊ संस्थांमध्येही असेच प्रशिक्षण कार्यक्रम सुरू करण्यात आले आहेत.
अमेरिका आणि युरोपातील विद्यापाठांशी करार...
या ड्रोन मॉड्यूलवर काम करणार्या मनीषा नेने म्हणाल्या, ड्रोन प्रणाली विविध हवामान परिस्थितीत प्रभावीपणे कार्य करतात आणि सशस्त्र दलांच्या ऑपरेशनल आवश्यकता पूर्ण करतात याची खात्री करण्यासाठी हे मॉड्यूल विकसित केले जात आहे. डीआयएटीने पीएचडी कार्यक्रमांसाठी अमेरिका आणि युरोपातील आंतरराष्ट्रीय विद्यापीठांशी देखील भागीदारीकेली आहे.