पुणे: वडकीमधील वलवा वस्ती परिसरात कौटुंबिक वादातून 35 वर्षीय तरुणाचा त्याच्या वडिलांनी खून केला. याप्रकरणी फुरसुंगी पोलिस ठाण्यात गुन्हा दाखल केला असून, आरोपीला अटक केली आहे. रविवारी (दि. 20) रात्री ही घटना घडली.
प्रशांत सुरेश जमदाडे (वय 35, रा. कैलासनगर, वलवा वस्ती, वडकी) असे खून झालेल्याचे नाव आहे. तर पोलिसांनी आरोपी वडील सुरेश बाबूराव जमदाडे (वय 59) याला अटक केली आहे. याबाबत मनोहर ताबाजी डोके (वय 36) यांनी फिर्याद दिली आहे. त्यांच्या मेव्हण्याचा खून झाल्याप्रकरणी त्यांनी सासर्याविरुद्ध तक्रार दाखल केली आहे. (Latest Pune News)
पोलिसांनी दिलेल्या माहिती नुसार, रविवारी (दि. 20) रात्री साडेनऊच्या सुमारास प्रशांत हा घरात दारू पिऊन आला. त्या वेळी घरामध्ये त्याची आई शारदा आणि वडील सुरेश हे दोघेही होते. प्रशांतने आई-वडिलांना शिवीगाळ करत झटापट करण्यास सुरुवात केली.
या वेळी चिडलेल्या बापाने मुलाचा गळा कापडी गमचाने आवळून त्याचे डोके जिन्यावरील फरशीवर आपटले. यात प्रशांतचा मृत्यू झाला. घटनेची माहिती मिळताच वरिष्ठ पोलिस अधिकाऱ्यांनी घटनास्थळी भेट दिली. याप्रकरणी पोलिसांनी आरोपीला अटक केली असून, पुढील तपास सहायक पोलिस निरीक्षक नानासाहेब जाधव करत आहेत.