बारामती: बारामती तालुक्यातील पणदरे येथील बॅंक आॅफ इंडियाच्या शाखेलगत असणाऱ्या एटीएम सेंटरमधील दोन मशिन फोडत चोरट्यांनी एकूण १४ लाख १९ हजार रुपयांची रोकड लंपास केली. या घटनेमुळे परिसरात खळबळ उडाली आहे.
माळेगाव पोलिस ठाण्यात अज्ञाताविरोधात चोरीचा गुन्हा दाखल करण्यात आला आहे. ही घटना बुधवारी (दि. २९) पहाटे घडली. याप्रकरणी बॅंक ऑफ इंडियाच्या पणदरे शाखेचे व्यवस्थापक तुषार लिलाधर पाटील (रा. देशपांडे इस्टेट, इंदापूर रोड, बारामती) यांनी फिर्याद दिली.
पणदरेतील पेट्रो कंपनीचे एक एटीएम मशीन असून, हे मशीन फोडत त्यातून चोरट्यांनी ११ लाख ९२ हजार ७०० रुपयांची रोकड लंपास केली. त्यात १०० रुपयांच्या १४१७, २०० रुपये दराच्या १५९० तर ५०० रुपये दराच्या १४६६ नोटांचा समावेश आहे. त्याच ठिकाणी हिताची कंपनीची दुसरी मशीन असून, त्यातून २ लाख २६ हजार ४०० रुपयांची रक्कम काढण्यात आली. दोन्ही मशीनमधून एकूण १४ लाख १९ हजार १०० रुपये लंपास करण्यात आले. तसेच एटीएम मशीन व सीडीएम मशीन फोडून नुकसान केले.
चोरट्यांनी पहाटे ४ वाजेच्या सुमारास एटीएम सेंटरमध्ये प्रवेश केल्यानंतर सुरुवातीला तेथील सीसीटीव्ही कॅमेऱ्यावर स्प्रे मारल्याचे दिसून येत आहे. परंतु, मशीनला असणाऱ्या सीसीटीव्हीत चोरटे कैद झाले. तीन-चार जणांनी हे कृत्य केले. तत्पूर्वी याच चोरट्यांनी सातारा जिल्ह्यातील खंडाळा येथेही एटीएम सेंटर फोडत लूट केल्याचे समोर आले आहे.
घटनास्थळी माळेगावचे पोलिस निरीक्षक कुलदीप संकपाळ यांच्यासह स्थानिक गुन्हे शाखेच्या टीमने भेट देत पाहणी केली. फाॅरेन्सिक तज्ज्ञांना पाचारण करत ठसे व इतर बाबी गोळा करण्यात येत आहेत. त्याद्वारे पुढील तपास सुरू असल्याचे पोलिसांनी सांगितले. चोरट्यांनी केलेल्या या लुटीमुळे परिसरात खळबळ उडाली.