आळेफाटा: आळेफाटा (ता. जुन्नर) येथील किराणा दुकानातील जबरी चोरीचा तपास करण्यात आळेफाटा पोलिसांना यश आले. याप्रकरणी एकास पोलिसांनी अटक केली. सलमान सादिक शेख (वय 24) असे या आरोपीचे नाव आहे. त्याच्याकडून दोन कारसह 11 लाख 96 हजारांचा ऐवज पोलिसांनी जप्त केला. या घटनेतील सात आरोपी फरार असल्याची माहिती पोलिस निरीक्षक विश्वास जाधव यांनी दिली.
पोलिसांनी दिलेल्या माहितीनुसार 20 जून रोजी रात्री आळेफाटा परिसरातील नाशिक महामार्गावरील सुरेश भगवान खांडगे यांचे लक्ष्मी किराणा दुकानाचे सुरक्षारक्षकाला कारमधून आलेल्या चोरट्यांनी मारहाण करून त्याचा मोबाईल व रोख रक्कम घेऊन त्यास शेजारील बोटा (ता. संगमनेर) गावच्या हद्दीत सोडून दिले. (Latest Pune News)
यानंतर पुन्हा येथे येत दुस-या कारमधून आलेल्या साथीदारांसह दुकानाचे शटर उचकटून रोख रक्कम, सिगरेट व गायछाप तंबाखू असा पावणेतीन लाख रुपयांचा मुद्देमाल चोरून नेला. याप्रकरणी आळेफाटा पोलिस ठाण्यात गुन्हा दाखल करण्यात आला होता.
पोलिस निरीक्षक जाधव यांनी पोलिसांना सदर गुन्हा उघडकीस आणण्यासाठी सूचना दिल्या होत्या. तांत्रिक विश्लेषणाच्या आधारे व गोपनीय बातमीदारामार्फत पोलिस पथकास सदरचा जबरी चोरीचा गुन्हा सलमान शेख व त्याचे साथीदारांनी केल्याचे समजले.
आळेफाटा पोलिसांचे पथकाने बीड येथे जात सलमान शेख यास ताब्यात घेतले. मात्र, यावेळी इतर आरोपी पळून गेले. शेखने साथीदारांसह दोन कारमधून येत चोरी केल्याची कबुली दिली. गुन्ह्यात वापरलेल्या दोन कार (एमएच 12 डीवाय 5920), एमएच 02 इएच 4758) व पावणेतीन लाखांचा मुद्देमाल पोलिसांनी जप्त केला.
सदर कामगिरी पोलिस निरीक्षक जाधव यांच्या मार्गदर्शनाखाली सहाय्यक पोलिस निरीक्षक अमोल पन्हाळकर, हवालदार विनोद गायकवाड, पंकज पारखे, अमित मालुंजे, नवीन अरगडे, ओंकार खुणे, गणेश जगताप, सखाराम जुंबड, प्रशांत तांगडकर, सचिन कोबल यांनी केली.