पुणे: मुंबईत माहिती तंत्रज्ञान विभागाच्या ऑप्टिकल फायबर केबल तुटल्यामुळे आधार पोर्टल बंद पडले. त्याचा थेट फटका दस्तनोंदणीला बसला. परिणामी, हजारो दस्तांची नोंद न झाल्याने पक्षकार हवालदिल झाले.
दस्त नोंदणी रखडल्याने राज्य सरकारलाही महसुलाचा मोठा फटका बसला. समस्या दूर झाल्यास दस्त नोंदणी कार्यालये उशिरापर्यंत सुरू ठेवण्याचे निर्देश नोंदणी व मुद्रांक शुल्क विभागाचे उपमहानिरीक्षक अभयसिंह मोहिते यांनी दिले होते. मात्र, रात्री उशिरापर्यंत ही समस्या कायम होती.
दस्त नोंदणी कार्यालयांमध्ये दुपारी साडेतीनच्या सुमारास आधार पडताळणीचे काम ठप्प झाले. त्यामुळे पक्षकारांसह नोंदणी विभागातील कर्मचारीही त्रस्त झाले. अधिक चौकशीअंती मुंबईतील माहिती तंत्रज्ञान विभागाच्या ऑप्टिकल फायबर तुटल्यामुळे आधार पोर्टल बंद पडले.
त्यामुळे दस्त नोंदणी रखडली. या समस्येमुळे राज्यातील दस्त नोंदणीवर परिणाम झाला. याबाबत नोंदणी विभागाने तातडीने माहिती तंत्रज्ञान विभागाला कळवले. मात्र, समस्या दूर होण्यास कालावधी लागत असल्याने पक्षकारांना अधिकचा वेळ देण्याबाबत मोहिते यांनी निर्देश दिले. त्यासाठी सर्व कार्यालये रात्री उशिरापर्यंत सुरू ठेवण्यात येणार होती.
मात्र, ही समस्या रात्री उशिरापर्यंत कायम होती. त्यामुळे अखेर पक्षकारांसह वकिलांना दस्त नोंदणी न करताच घरी परतावे लागले. या समस्येमुळे किती दस्तांवर परिणाम झाला, तसेच किती महसूल बुडाला याबाबत माहिती मिळू शकली नाही.